Tourism director ni leh si dawn

Mizoram Sawrkar chuan ni 30.4.2026 a sawrkar hna atanga pension-a chhuak R Lalrodingi chu Tourism director atan a ruat leh si.

DP&AR chuan ni 24.4.2026 khan order chhuahih Commerce & Industries additional director atanga ni 30.4.2026 atanga pension-a chhuak tur R Lalrodingi chu ni 1.5.2026 atangin OSD to CM bakah Tourism director atana ruat a nih thu tarlan a ni.

Ni 15.5.2026 khan DP&AR chuan order ti chhuak lehin OSD to CM atan chauh R Lalrodingi hi rawih nawn a nih tawh thu tarlan a ni tawh.

DP&AR vekin vawiin (22.5.2026) hian order ti chhuak lehin OSD to CM R Lalrodingi chu Tourism director charge la tel tura tih a nih thu tarlan a ni.

Tarlan tawh angin, pension tawh R Lalrodingi rawih nawn a ni chu MZP chuan an duh loh thu ni 8.5.2026 khan press conference neiin an puang a; rawih nawnna order chu ni 14.5.2026 ral hmaa sût turin sorkar an ngen.

Chief Minister Lalduhoma chuan ni 13.5.2026 zan khan a office-ah MZP hruaitute a kâwm a, R Lalrodingi rawih nawnna chu ennawn a remtih thu a lo hrilh a ni.

Hetihlai hian Mizoram Tourism Service Association (MTSA) leh Tourism Staff Welfare Association (TSWA) chuan thuchhuah siamin, an director R Lalrodingi rawih nawn a ni chu lawmawm an tih thu an tarlang.

MTSA leh TSWA chuan, an director R Lalrodingi chu North Eastern Council (NEC)-ah hun rei tak tourism adviser hna lo thawk tawh a ni tih an tarlang a, “Tourism department chuan kawng hrang hrangin nasa takin hma a sawn phah a, a hlâwkpui tak zet a ni. Central leh state sorkarah te pawh hetianga mi bikte hi chu rawih nawn an ni fo ṭhin an ti.