News

MNF President Zoramthanga chuan a social media account-ah Mizoram Sorkarin petrol leh diesel (tuialhthei) a social infrastructure cess leh road maintenance cess litre khat zela Rs. 2 ve ve a lak chu ngaihtuah nawn se tha a tih thu a tarlang.

Zoramthanga chuan West Asia ram buaina zual zel avangin crude oil man a sang a, khawvel market-ah ‘war premium’ a siam zui tih tarlangin, “India ram pumah oil man pawh a tihsan phah. Mizoram pawhin kan lo tuar phak ve zel a ni. Vawiin (May 25, 2026) hian Aizawl (MIZOFED) ah pawh petrol litre khat Rs. 106.39, diesel Rs. 95.07, XP Rs. 115.03 a kai tawh. Heng oil manah hian ZPM kaihhruai sorkain September 2024 aṭanga a lak ṭan Cess pahnih, litre khatah Rs. 4 a tel,” a ti.

Oil man sang hi mipuiin (indirect or indirect) kan tuar chho ṭan mek tawh tih tarlangin MNF President chuan, “Lirthei neitute, public service vehicle khalhtute, taxi driver te, chhungkuaa sum thawkchhuaktu leh an eizawnna thlengin a nghawng mek a ni. Thil man a san chuan mipui hi a tuartu kan ni zel. Chuvangin mipui tawrhna leh chhungkaw tam tak phurrit tihziaawmna turin ZPM kaihhruai Sorkar hian Oil man a belhchhahna ‘Cess’ chi hnih a lak mek hi ngaihtuah nawn leh se a ṭha hle mai. Cesschi hnih ngawt an lak hi tihbo a nih chuan chhungkaw tam tak, Oil man sangin a nghawng tur mipuite phurrit pawh a chhawk zangkhai ngei ang,” tiin mipui chhawk zangkhaina tur ngaihtuah chu sorkar mawhphurhna a nih thu a tarlang.