Vavu Sanctuary hawn a ni

Nimin (21.11.2025) khan Farkawn Village Council, All NGO’s Farkawn leh Conservation Mizoram te hmalakna a din, ‘Lurh Tlang Vavu Sanctuary, Farkawn’ chu Champhai DFO Lalbiakchama’n Lurh Tlangah a hawng.

Lurh Tlangah hian Mizoram State Bird, Vavu (Mrs Hume’s Pheasant) te hi an awm nual nia hriat a ni a, kumin May – September inkara chhinchhiah theih zat hetiang hi a ni. A puitling 20 (a pa pariat 8 leh a nu 12) leh a note 8 te an ni.

Heng lo pawh hi Bualpui tlangdung leh Lurh kawng chung tlangdungahte pawh hmuh ṭhin an ni.

Khawtlang hruaitute leh Conservation Mizoram te’n a humhalh hna thawkin, zirchianna kalpui mek zel a ni. Vavu te hi nungcha mang mai hlauhawm dinhmuna ding mek niin, humhalh ngai tawh tak an ni.

Lurhtlang Vavu Sanctuary, Farkawn hi Sanctuary Managing Committee-te’n mumal taka enkawl tura ruahmanna siamin, inkaihhruaina fel tak siam a ni. A tlawhtu turte’n Sanctuary Managing Committee te biak hmasak zel tur a ni ang.