Zirtirtute’n badge dum an bel

Mizoram Government Adhoc Aided Middle School Teachers’ Association (MGAAMSTA) member-te chuan nimin khan Mizoram Sawrkarin rules thar a siam duh loh lantirna atan badge dum an bel.

MGAAMSTA chuan Mizoram Sawrkarin Mizoram Education (Provisional Adhoc Grant-in-Aid for General Maintenance of Private School) Rules, 2025, (No. A-11015/10/2025-EDN, Aizawl, the 15th July, 2026) chu tichhuak in, he rules hian deficit grants-in-aid schools, adhoc grants-in-aid schools leh provisional adhoc grants-in-Aid School-te a huam tih tarlangin, “He dan thar hi ngun taka kan zirchian hnuin, zirlaite leh sikul tan ngei pawh thil tha lo tam tak, tun leh hun lo kal zel turah thlen thei tur dan niin kan hria a, tha kan ti lo hle,” an ti.

Sawrkar hmasain a lo dah tawhna (provincialised) humhim tur leh sikul, zirlai leh khawtlangin hamthatna an dawn tawh, an hloh leh tak hmu let leh ngei turin ruahmanna an siam thu tarlangin MGAAMSTA chuan, “Zoram mipui zawng zawngte thlawpna leh tawiawmna mai bakah kan sorkara hotulu ber berte khawngaihna leh hriatthiamna sang ber pawh kan ngen tak meuh a ni,” an ti a, lungawi lohna an lantir chhunga zirna kawngah bahlahna a lo awm a nih pawhin mipuite hriatthiamna an ngen.

RULES THAR THA AN TIH LOH CHHANTE :

1)The Right of Children to Free and Compulsory Education Act, 2009-in naupang kum 14 leh a hnuai lamte, hmangaih leh duhsak taka, kilometre thum (3) aia hlaa middle school (upper primary) zirlaite sikul kal lo tura a tih mek laia, sorkarin kan dinhmun min phet thlaa dinhmun hniam zawk leh sikul pawh khar mai thei dinhmuna min dah a tumna hian, naupang sikul kalna pawh hla tak tak ni thuai mai thei dinhmunah a dah zui ta bawk. Hei hi elementary education dah pawimawh tawk lohna leh RTE Act ngaihpawimawh tawk lohna leh palzutnaah kan ngai.

2)Sorkar hmasain, October, 2023 atanga hman tan tura dinhmun tha zawk a min dah tawhna min thiah sak hnuah, dan chhe tak mai, tuna kan dinhmun mek, adhoc aided dinhmun pawh tlukzo lo tur dan, thlir thuaka \hat hmel tak, han zir chiana tha hauh si lo ‘The Mizoram Education (Lump – Sum Grants-in-aid for General Maintenance of Private School) Rules, 2026’ min barh luih a tum dan hi dan tha lo tak a nih avangin kan duh lo takzet a, pawm theih tur chiah kan ngai lo.

3)Govt. school leh zirlaiten an dawn ang hamthatna hrang hrang heng, composite school grant, library grant, sports grant, eco club and youth club grant, uniform grant leh hamhatna dang dangte, sikul leh sikul naupangten kan dawn ve theih hun tur nghakhlel taka kan thlir ve thin chu engtikahmah dawng ve thei ngai lo tura min siamtu dan a nih dawn avangin pawm theih chi ah kan ngai lo.

AN HMALAK DAN TUR

1.Dt. 3. 8. 2026 atanga Dt. 7. 8. 2026 inkar hian member zawng zawngten badge dum bel tur a ni a.

2.Dt. 10. 8. 2026 atanga 12. 8. 2026 chhung hian badge dum bel chungin pen down strike / no teaching day hman leh tur a ni ang.

3.Heng pahnihte hian kan beisei ang a thuneitute a ko eih zo lo a nih erawh chuan Dt. 18. 8. 2026 hian member zawng zawngte Aizawl khawpuiah kan kal zel dan tur ngaihtuah a kalkhawm tur a ni ang.