ZMC&H hnenah ambulance leh khawl hlan

Vawiin (5.6.2026) hian Indian Oil Corporation Ltd. (IOCL)-in Corporate Social Responsibility (CSR) initiative atangin Zoram Medical College & Hospital (ZMC&H)-a damlo na zual enkawlna tur khawl changkang (critical care equipment) leh advanced life support ambulance an hlan a, Health Minister Lalrinpuii’n a telpui.

Health Minister chuan IOCL-te chungah lawmthu sawiin, “Mizoram health care service hmasawn zelna atan Rs 62,38,548 hu zet (C-Arm Machine, Diathermy Machine leh advanced life support ambulance) hmanga min puihna hi khawtlang hriselna leh damlote himna in ngaihpawimawhzia tilangtu a ni. He thilpek hlu tak hi hmanrua a nih mai bakah, Mizoram mipuite nunna chhanhimna te, rikrum thila rang zawka inenkawlna leh surgery (inzaina) lama ram hmasawnna atana investment pawimawh tak a ni,” a ti.

C-Arm Machine hian orthopaedics (ruh), general surgery, urology leh trauma care lamah puiin, Diathermy mMachine hian surgery him zawk neihna kawngah nasa takin a pui thei dawn. Advanced life support ambulance hian damlo dinhmun hlauhawma dingte him leh rang zawka phurhna leh ambulance chhunga treatment pek theihna kawngah a pui thei dawn a ni.