ZPM Office-ah Sailova’n thu a sawi

ZPM chuan vawiin (17.11.2025) hian an office-ah chhung inkhawm an hmang a, Dampa Bial MLA by-election a candidate Vanlalsailova’n thu a sawi.

Vanlalsailova chuan vawiinah hian hlawhtlinna avanga lawmthu sawi tur angin thla hmasa lamah te kha chuan a insuangtuah rilruk thu sawiin, “Nimahsela, tunah chuan tlin zawh loh avanga ngaihdam dilna leh hriat thiam ngenna thu sawi a ngai ta. Kan chak loh avanga tute emaw mawhpuh kual tur ka zawng lo va, a chhan bul ber chu keimah ka ni tih ka pawm thlap a ni,’ a ti.

A chak lohna chu an inhmuh chhuah nan Lalpa’n malsawm se a duh tih sawiin Vanlalsailova chuan, “Politics-a kan hlawhchhamna hian Pathian hmel a tibal tur a ni lo tih hi ka duh dan a ni. Kum 2023 inthlanpuia kalphung thar mipui sorkar kan din theihna tura a thli tlehtirtute zinga hmanruaah Pathianin min hmang ve a; mahse, inthlanah ka tling zo ta lo. By election-ah ka tling lo leh ta,” tiin a tuartu leh hrehawm ti ber chu amah a nih a rinthu a sawi.

Vanlalsailova chuan ZPM-in an thil tum an tihhlawhtlinna turin tuna a dinhmun hi darthlalang atan hun a niah a ngaih thu sawiin, “Theihtawp chhuahin he ram tan hian hma kan la zel ang,” a ti.