ZPM President-in hriatthiamna a dil

ZPM President Lalliansawta chuan vawiin (8.11.2025) hian Aizawl Press Club-ah press conference neiin, Dampa Bial MLA by-election lo awm tura an campaign naah an party-in mi rilru an tihnat chuan hriatthiamna dil.

ZPM President thusawi :

Vanduaithlaktakin, Dampa bialtu MLA duhawm tak Lalrintluanga Sailo chuan hun lo takah min boralsan a, loh theih lohna avangin Dampa bialah inthlan thatna (by-election) neih a lo tul ta. Party hrang hrangin theihtawp chhuahin kan campaign a, tunah a hmawr kan bawk dawn hnai ta a ni. Kar lo awm tur Thawhlehni (11.11.2025) mai hi vote thlak hun tur a lo ni ta reng mai a. Dampa bial mipuite hnena ka ngen duh chu – ZPM Candidate Vanlalsailova lo vote theuh turin ka ngen che u a ni.
He inthlan tur atan hian party tin te kan tang em em a, keini ZPM Party pawhin theihtawp kan chhuah a, kan campaign danah mimal leh pawl hrang hrang leh party dang te rilru tina zawng emaw mit timim zawng emaw pawhin kan hriat loh hlanin kan lo awm mai thei a ni. Chutiangte a lo awm a nih chuan an hriatthiamna kan dil tak meuh a ni.
Pathian leh Mizoram mipuite duhsakna changin kum 2023 General Election-ah sawrkarna kan siam a. Tunah hian kan sawrkar hian kum hnih a lo tling ve dawn ta reng mai. December thlaah kum hnih a tling dawn. Kum 2 kan sawrkar chhung hian theihtawp kan chhuah a, Mizoram leh Mizo mipuite tan pawh thil tha tam tak kan ti tawh a, kan ti mek zel bawk a. Hetih rual hian mipui duhkhawp kan tlin lohna lai te pawh a awm tih kan hria. Tun term hmang zo tur hian kum 3 hun kan la nei a. Mizoram leh Mizo mipuite tan ZPM hian theihtawp kan chhuah zel dawn a ni.
Kan sawrkar kum hnih chhunga kan thil tha tih hrang hrangte hi tunah hian sawi lan vek sen a ni lova. Kan sawrkar hlawhtlinna (achievement) dahkhawmna lehkhabu ‘booklet’ siam turin kan inbuatsaih mek. Hun rei loteah kan tlangzarh theih kan beisei. Chutah chuan chiang zawkin a chuang dawn a ni. Kan sawrkar kum hnih kan hman mek chhunga ka lawmna ber chu – eirukna (corruption) lakah kan Minister leh MLA zingah hminghliau pakhat mah an awm lo hi a ni. Kan tum ang ngeiin eiruk awm lohna, langtlang sawrkar kan siam mekin ka hria a, lawmawm ka ti takzet a ni.