Loan rul tha lote in chhuh sak

Securitisation and Reconstruction of Financial Assets and Enforcement of Security Interest Act,2002 (SARFAESI Act, 2002) hmangin Mizoram Rural Bank (MRB), Champhai Branch hnuaia loan la, rul tha duh lo mi pathumte in dinglai loan lak nana dahkhamte chu Champhai District Magistrate James Lalrinchhana thupek angin vawiin (3.5.2024) chhun khan chhuhsak an ni a, MRB, Champhai Branch kutah hlan nghal a ni.

Champhai District Magistrate chuan SARFAESI Act, 2002 hnuaiah Champhai khawpui chhunga loan rul tha lo mi pathumte laka dan kengkawh turin thupek nimin khan a tichhuak. Dr. Manesia Khaimeichho, Sub-Divisional Magistrate, Champhai District kaihruaiin MRB hotute leh Police-te'n SARFAESI Act, 2002 hnuaia Section 14 (14)(i) in thuneihna a pek tlawhchhanin loan lak nana dahkhamte chu loan rulh that loh (Non-Performing Assets) avangin lilam turin an chhuhsak ta a ni.

Vawiina SARFAESI Act, 2002 hmanga loan rul tha lo ram dahkham chhuhsakte hi Champhai khawpui huam chhunga Dinthar Vengah 1, Bethel Vengah 1 leh Zoteah 1 te a ni. In dinglai chhuhsak tak pathumte hlutzawng belhkhawm hi a hniam thei ang bera chhutin Rs 92,39,329 vel bawr a ni a, loan rulh ngai la bang hi Rs 57,36,424  a ni. Loan rulh ngai aiah hian an ram dahkham chhuhsakte hi bawhzui tul angte tihfel a nih hnuah lilam tura ruahman a ni ang.