Sahuan atanga sava bo la hmu lo

Aizawl Zoological Park atanga sava chi khat, manto tak (lears macaw), July 2, 2023-a bo chu hmuh a la ni lo. A bona kum 1 a tling hnai tawh.

Bengvarna thudawn danin, lears macaw bo chungchangah hian FIR thehluh a nih angin police-te chuan an chhui. Hemi kaihhnawihah hian mi eng emaw zat thuzawhfiah ni tawh mah se, sava bo hi hmuh chhuah a la ni lo. Hetihlai hian he thubuai hi tihtawp a la ni lo thung.

Central YMA hnuaia ruihhlo dotu Central Anti Drugs Squad (CADS) chuan July 1, 2023 khan Seling daia lirthei an endiknaah lears macaw an man a, Environment Forest & Climate Change (EFCC) Department hnenah an hlan. EFCC chuan Aizawl Sahuanah an dah a, sahuana dah a nih tûk atangin hmuh a ni lo zui a ni.

Sava bo chungchangah CYMA chuan thuchhuah an siam tawh a, sava a bo chu hriatthiam har an tih thu tarlangin, mawhphurtu zawng chhuak a, hrem an nih ngei theih nan hma la turin EF&CC Department an phût a ni.

Lears macaw hi vaki chi khat niin, Brazillian parrot ti pawhin a sawi thin. Brazil-a state pakhat Bahia chu an chenna hmunpui ber a ni. Sava vang tak niin, tunah hian khawvel pumah 1,600 vel chauh an awm tawh.

Sava lian tak tia sawi tur an ni lo a, cm 70 atanga cm 75 vel thleng an ni thei a, grams 950 vel thlengin an rit thei. A van tawh avangin a man pawh a to hle a, India ramah chuan a len dan a zirtein Rs 35,000 atanga Rs 250,000 mante an ni hlawm.