Baryl-'n Escape Engmoia a chhan?

MLA Baryl Vanneihsangi chuan MZU Virthli-a Urfi Javed chah chhuaktu designer Escape Engmoia chhanna ni ngeia hriat a social media account-ah a post.

Baryl-i thu post : 

Ngaihsaktu leh hmalaksaktu department hran nei ve lo 'entertainment' hian mi tam tak eizawnna a siamsak a, designer, model, zaithiam, lamthiam leh a huang chhunga mite hian sorkarah beisei nei lovin anmahni phak ang tawkin ke an pen ve mai thin. Chuvangin, kut hnathawh kan ngaihpawimawh tluk zet hian kan thalai entertainment huanga eizawngte hi kan support a hun tawh.

Kan ram thalaite hmasawnna tura puitu nih tum si lo, thlâwp a hneha sêltu leh politics-a kailût tawk politician nih hi a hlauhawm hle. Kum hmasa lama Virthli rûnway show kan sêl chiam hnu khan MZU-te chuan India rama zirna in tha nihna an rawn nei thei kha a ni a, an intihhlim ve na pakhat khan a hnuk hniam lo tih a chiang awm e.

Kumin Vîrthli Fashion Show-ah a fashion (mak leh dangdai) avanga hriat hlawh tak pakhat a rawn kal a, 'vai buh' ei chunga Kristian tha tak kan nih theihna hloh mai tur anga sawi awmte hi a zahthlak a, kan rama vai party zawmtute zingah pawh rinna kawnga entawntlak tak tak an awm tih kan theihnghilh loh a tha.

Hman deuha Vanapa Hall khat tlata Shashi Tharoor hmu tura kalte khan Hindu pachal a nih an hria, a professional line an kal chhan zawk a ni. Kan ram pawn atanga lo kal hi chu sakhaw dang vuantute an ni lo thei bawk a ni.

Vawiina International artist kan ngaihsan leh entawn te hi rinna kawngah chuan kan tana entawn tlak loh deuh vek an ni zawk, kan ram leilung rawn rap lo mahse phone kaltlangin min chenchilh nasa hle a, kan nun an luhkhung hneh zawk!

Vîrthli Runway Show buatsaihtu @escape_engmoia hi fashion khawpui Milan-ah pawh Mizo hming chawimawitu a ni a, retheihnain a hneh loh, a tumruhna leh chhelna avanga National leh International Fashion Show nei thei Mizo thalai hi ka chhuang takzet a, kan tih theih tawk amah tawiawm aia sang hi a phu hlein ka hria. Rûnway Show kum 10 zet neih tir tu Pathian theihnghilh lovin lo vûl zel rawh se.