LADC-in CEM thar a nei

Lai Autonomous District Council (LADC) Chairman atan VL.Hmuaka thlan a ni a, Governor-in Chief Executive Member (CEM) N.Zangura chuan thlawptu neingah tawk em tih fiahna a paltlang.

Vawiin (22.8.2025) a LADC Session, chawhma lamah Protem Chairman Lalthanmawia Colney kaihhruaiah chairman thlanna neih niin, United Democratic Alliance (UDA) atanga hming pelut, Lawngtlai Vengpui Bialtu MDC VL.Hmuaka chu chuhtu awm loin chairman ah thlantlin a nih thu Protem Chairman in a puanga, hemi hnu hian chairman thar VL Hmuaka hian a thutna a luah nghal.

Chairman thar VL.Hmuaka kaihhruaina hnuaiah vawiin chawhnu dar 2 khan CEM N.Zangura'n thlawptu a neihdan House ah fiah a ni a, CEM thlawp lamah member 14 in ban pharin, thlawp lo lamah member 5 in ban an phar thung. Chairman VL.Hmuaka chuan N.Zangura'n CEM atana fiahna a paltlang thu a puang.

CEM chuan LADC sorkar mumal loh vanga nasataka tawrhna karah, fiahna a paltlang thei chu Pathian remruat a ni tih sawiin, member-te chungah lawmthu a sawi.

A kaihhruai sorkar chuan dik takin rorelna kalpui an tum tih sawiin N Zangura chuan, 'Sum harsa leh indaih lohna nasatak karah, a nihdan tur taka sum hman a pawimawh,' tiin LADC hnuaia officer leh thawktu dangte pawh, sorkar thatak din a nihtheih nan an hmazawnah thahnemngai taka thawkturin a chah.

Tarlan tawh angin UDA hi BJP leh MNF thawhoin an din, Congress MDC neih chhunin pawn lam atanga a thlawp a ni. N Zangura hi BJP niin, LADC term kal mekah ani hma hian MNF, Congress leh ZPM-in CEM an lo nei tawh a ni.