Eirukna dona kan bei nghal chat - Duhoma

Vawiin (22.8.2025) hian Mizoram Police Service Association (MPSA) chuan G.S. Arya Mess, PHQ ah an conference vawi 15-na an hmang a. Chief Minister Lalduhoma'n khuallian niin a hmanpui.

Chief Minister chuan tun hnaia Assam state nena ramria thil thleng chu a hriat veleh Assam Chief Minister nena an inbiak nghal thu a sawi a, 'Tuman harsatna siam zawnga engmah tih rih lo (status quo) tura kan lo sawidun tawh chu tha taka ken kawh kan remti dun a ni,' a ti. 

Aan sorkar phat atangin eiruk dona lam kan rawn bei nghal chat tih sawiin Lalduhoma chuan, 'Lok Ayukta kan thuam tha a, Inquiry Wing hawn belhin MPS officer deputation post 3 (pathum) – Chief Inquiry Officer, Inquiry Officer leh Dy. Superintendent of Police te kan siam,' tiin MPS Officer pathum zet in awm belh chuan, hma kan sawn ngei turah an ngaih thu a sawi.

CM thusawi dangte :

1. Mizoram Police constable recruitment neih tawh zawng zawnga belhchian dawl ber leh fair ber tia sawi ngam - constable recruitment tun hnaiah kan nei a, police 259 lak thar an ni. Sorkar hnathawk lak kawngah hian dan ang taka kalpui leh a tling ngeite chauh lak hi kan thupui a ni. Mipui sorkar kan nih angin tumah thlei bik neih kan phal lo. Constable kan lakna kawnga thawktu in ni a, in chungah lawmthu ka sawi.

2. Kan police zingah service laia thi kan ngah thin hi ka vei a. An thih chhan tam ber lah hi nun inthlahdahna kaihhawih natna a ni deuh zel a. MPS officer zingah chuan in awm lo turah ka ngai a, in naute enkawl kawngah fimkhur rawh u. Tin, officer-ten in service leh in hamthatna ringawt in ngaihtuah a, in hnuaia thawkte hamthatna in ngaihthah leh si hian dik kan ti lo. Kan staff-ten beisei (claim) an rawn neihin a lo dang bettu ni loin a lo tanpuitu kan ni thin tur a ni.

3. Police officer chuan kan ram dante, dan thar leh amendment awm tharte kan hre bel tur a ni. Dan hi kan hmanraw tangkai, kan silai aia kan hman rim zawk a ni. Misualten min fin khalh tur a ni lo. Dan hriat kawngah chauh ni loin, suahsuahna thar lo chhuak zelah pawh misualten min hmakhalh tur a ni lo.

4. Ram nuam tehna bulhrum chu a chhunga cheng mipuite zalenna leh ralmuannaah a ni. Tin, ram hmasawnna hnathawh tinreng hi remna leh muanna boruak hnuaiah chauh tihpuitlin theih a ni. India rama state ralmuang bera kan inchhal ngamna chhan hi in thawh that thin vang a ni. He hnathawh tha hi chhawm nung zel turin inbuatsaih ila, remna leh muanna palai ni zui zel ang u,