Guitar instrumental album

Mizo thalai zinga guitarist hriat hlawh Zothanpuia Rokhum (Ztpa Rokhum) chuan guitar instrumental album hmasa ber Vantage Point a tichhuak, ni 17.5.2025 (Inrinni) tlai khan Sports & Youth Services Auditorium-ah Zothanmawia CEO Mystique Music Network- in a tlangzarh.

Ztpa Rokhum hi hranghlui zaithiam leh hlaphuah thiam Sikulthanga Rokhum fapa a ni a, Mizorama Rockschool London exam buatsaih hmasak ber kum 2012 khan Electric Guitar Grade 8 exam lehin distinction-ah a pass a, Mizoram Center atanga pass hmasa ber a ni.

March 2006 – May 2014 chhung khan Mystique School of Music ah zirtirtu hna a thawk a, heta a thawh chhung hian guitar lesson grade 1- 6 tha tak a siam a, music school hrang hrang pawhin tun thleng hian an la hmang nghe nghe. 

June 2014 atangin ama pual Music zirna Drop Doubt School of Music hawngin hlawhtling takin a enkawl zel. Drop Doubt Band a guitarist niin thalaite hriat hlawh hla tha tak tak enge maw zat an tichhuak tawh nghe nghe. 

Mizo guitarist hriathlawh ber pawlin ama phuah instumental music hla 10 awmna Vantage Point a tichhuak thei ta hi a lawmawm hle. Music genre hrang hrang Rock, Rock Fusion, Funk leh Metal ziarang awmna a ni. Aeris Records (Zuala Jahau)-ah recording tiin an ni hian mixing leh mastering thlengin an khawih nghal vek a, album cover hi Patea Redmark design a ni thung.

He instrumental album-a Ztpa puitu musician-te hi Drop Doubt Band memberte bakah rimawi tawnhriat nei tha tak tak an ni a, chungte chu Michael (Bass); Fakawma (Bass); Samuela (Keys); George Hmar (Keys); John Tetea (Drums); Joshua (Drums) te an ni a, an kuthnu ngaithlak man hla tak tur a ni. 

Vantage Point album hi Darbu Apps–ah  Rs 200 in a lei theih a ni a, he album hi music platform dangah chuan tihchhuah a ni dawn lo.