BJP-in secularism nuaibo an duh - Lal Thanzara

Vawiin (August 22, 2025) hian Congress Bhavan-ah MPCC political session an hmanga, thusawitu MPCC President Lal Thanzara chuan BJP chu secularism nuaibo duhah puhin, kumin Independence Day lawmna-a Chief Minister Lalduhoma thusawi a sawisel.4

MPCC President Lal Thanzara chuan, 'Kan Chief Minister hian Independence lawmna ah khan thu tamtak a sawi a, khatah khan a speech a ziah lan chiah loh I&PR in thuchhuah an siamah a thusawi anga tarlan a awm. Ram zalenna humhim tur leh ramin hma a sawn zel theih nan Prime Minister Narendra Modi a thawhpuite kut tichak tura Zoram mipuite min sawm thute an tarlang a ni. A tarlang tute hi sawrkar thupuangtute an ni a, a dik turah kan ngai a ni. Kan Chief Minister-in Narendra Modi kut tichak tura min sawm ta mai hi a vanduaithlak takzet in ka hria a, a chhan chu tunhnaiah Kristiante chunga hleilenna Chhatisgarh-ahte, hmun hrang hrangah a thleng a ni,' a ti.

Tunhnai maite khan Chhatisgarh-ah Bajrang Dal leh Vishua Hindu Parishad-ten Kristiante inkhawm lai luhchilhin sakhaw danga inlehluihtirna kalpui angahte an puh nia sawiin Lal Thanzara chuan, 'Nasa takin min bei a ni. Kan hriat reng tur chu BJP mit timim tu ber chu constitution a secularism, sakhaw zalenna kan tih hi a ni a, hei hi nuaibo an duh a ni. Hei hi a chianna chu Kristian inkhawm laite an bei hi a ni,' tiin hmanni lawk pawh khan Seventh Day Adventist-te inkhawm an tibuai a, an biak inahte pawh Hindu puan sente an tar thu a sawi.