Ni 3. 5. 2024 (Zirtawpni) khan Chhippui khúa, Vengchung (Mamit District)-ah  Zothangate in chu vanduaithlak takin bungrua eng mah chuh hman lohin a kang ral vek.

Chhippui Branch YMA Secretary tarlan danin, in kan hun tak hi hriat hian a ni chiah lo a, zan dár 6:45 - 7 bawr vel ni a ngaih a ni. Mei hi an thuk atanga intan niin, an thuka mei hi kawngka inhawng atanga thli lo lutin a chhem alh a, hei hi an in bangah kang kaiin kangmei hi a chhuak ta a ni.

A kan lai hian an nu ber Lalbiakmawii hi inhlawhna chungchang vela a chhuah lawk hlan a ni a, a fapa Jacob Laldinsanga, kum 4 mi bawr vel a muhil a, ani bak chu tu mah an awm lo.

In kang a awm a ni tih hriat a nih veleh hian nula Lalbiakthangi d/o R. Ramliana chu an in atangin a tlan chhuak nghal a, a zu thlen thlak hian in kang hi a lo nasa tawh hle a, țhelh theih rual a ni tawh lo.

A chhungah naupang a awm avangin Biakthangi chuan kawngkapuia luh tumin nasa takin a bei a, kang hi a nasat tawh êm avangin kawngkapui hi a lo kang sawi hman tawh a, luh theih a ni tawh lo.

Tukverh te reuhte, (ft 1-ft 2 bial ang vel a nih hmel e) mihring leng țawk țawk ang velah chuan thei leh thei loin a bawkvak lut a, a zu luh lai hian naupang hi tui takin a lo la muhil a ni.

Naupang tui taka lo muhil chu pawmin chhuahpui a tum a, mahse, amah pawh a leng țawk țawk chauh a nih avangin leh tukverh hi a san avangin naupang nen chuan chhuah theih rual a ni lo. Mi dang tu mah an la awm loh avangin, "Min pui r'u," tiin a au ta vak vak a ni.

Hei hi hriain a nu Remi chuan mei kang nasa tawh tak hnuaiah tukverh bulah lo changin an la chhuak thei ta a ni. Biakthangi chhuak leh lam tur hi tukverh a tet êm avangin leh a sân ve deuh avang hian a buai hle a,  meikhu nen, a sa tawh bawk nen,  engtin tin em maw bawkvak chhuakin, tukverh atang hian a tla thla ta a, a chhuak thei hram. A chhuak tur hi a ke a tang a, a chappal pawh a la chhuak thei lo a, a kang ral vek a ni.