Private agency hum tumah CM puh

Mizoram Pradesh Youth Congress Committee (MPYCC) chuan vawiin (5.5.2024) chhun khan Aizawl Press Club-ah press conference an nei a, private agency-te hum tumah Chief Minister Lalduhoma an puh.

MPYCC hruaitute chuan lehkha a thehluh tuma Chief Minister Lalduhoma'n lehkha an thehluh tuma  Mizoram Private Placement Agencies (Regulation) Act , 2015 felhlel leh bilha tho lo anga a sawi chu mak an tih thu sawiin, 'Private agency hum tumna niin kan hria. He dan dikhlel leh a bilh a tho lo anga CM-in a puhna hi belhchian dawl lo a ni. He dan a Mizoram pawn a huap avanga dikhlel anga a sawi hi a dik loa, Mizoram pawnah placement agency-te hian placement an tih theih ngei a ngai zawk,' an ti.

Mizoram pawna placement an tih theih nan 'beyond the boundaries of Mizoram' tiin Mizoram Sorkarin dan a lo siam zawk nia sawiin MPYCC hruaitute chuan, 'Chutih lai chuan India ram pawn, foreign-a hnathawktu tur thawn chhuak a, placement tih chungchang erawh chu  India Sorkar laipui thu a ni a, Indian Constitution a Seventh Schedule hnuai a Union list a mi a ni,' tiin India ram pawna hnathawktu thawnchhuak tur chuan Ministry of External Affairs hnuaia Protector General of Emigrants office-ah an in register a, registration certificate an neih a ngaih thu an sawi.

MPYCC hruaitute CM-in Mizoram Private Placement Agencies (Regulation) Act , 2015 dikhlel, a bilha tho lo tia a sawi chu a dik lo tih sawiin, 'Section 8, Sub-section (3) ah chuan hmeichhia, kum 18 tling lo hnathawka thawnchhuah khap tlat a ni. Agency hmeichhe naupang kum 18 pawh tling lo Dubai-a thawn tute hian he dan hi an bawhchhe ngei zawk niin kan hria. Hei bakah hian midang passport hmanga an kaltir lehzel hi dan bawhchhiatna serious tak a ni a, human trafficking a ni bawk a, a case hi a serious hle,' an ti.

Hmeichhe naupang pahnih, Dubai Jail-a thla 7 an tantir te tirtu agency te hian dan an bawhchhe ngei tih sawiin MPYCC hruaitute chuan, 'Mizoram Private Placement Agencies (Regulation) Act , 2015 Section 9, Sub-section (2) ah chuan section 8 dan an bawhchhia a nih chuan hremna kum thum thleng lungina khung emaw, cheng singnga thleng chawi tir emaw, a pahnih pawha hrem theih a ni,' tiin section 14-ah pawh he dan an bawhchhia a nih chuan ‘Offence to be Cognizable and Non-Bailable’ a nih thu an sawi.

MPYCC hruaitute chuan CM chu a fa anga a en tur hmeichhe naupangte, tanpui ngai em emte pawh ngaituah loah puhin, 'Dan bawhchhia a kum tling lo Dubai-a thawntute tan zawk anga lang a, an thlavang rem leh rem loa a hauhsak mai hi a dik loa, anmahni hum tum anga a tawng hi dikna (rule of law) rahbeh tumna ni ngeiin a hria a ni. Agency neitu hi CM-te awmna veng Chawlhmun mi, dan  bawhchhe tute nen hian inzawmna thuk tak an lo nei em ni?' an ti.

MPYCC chuan agency neitute hian CM  campaign fund te an lo tum sak ve em ni? thenkhatin agency neitunu pa hi  kan CM campaigner a ni tia an sawi te hi a dik ta mai em ni ? tihte an zawt.