Police-in hmawr la bawk hnai lo

Mizoram Police-in an din Special Investigation Team (SIT) te chuan Mahindra Mahindra Financial Sevice Ltd. (MMFSL)-a cheng vbc. 150 vel tihchingpen thubuai  an la chhuizo loh bakah a hmawr an la bawk dawn hnai lo.

Bengvarna thudawn danin, SIT-te chuan he thubuai hi ngawrh takin an chhuzui zel a, chhui ngai a tam avangin a hmawr an la bawk dawn hnai lo. He thila inhnamhnawihvea puh Aizawla car dealer thenkhatte pawh an inhnamhnawih dan leh hlawkna an tel zet uluk taka la chhuizui zel a ni.

He thubuai kaihhnawiha a tir lama an man mi 11 bak man belh an la nei lo. Mi 11 te hi Central Jail-ah dah vek an ni tawh a, thuzawhfiah belh duh an neih chuan court-ah kawl phalna an dil thin.

Tarlan tawh angin,  DGP Anil Shukla chuan ni 26.4.2024 chhun dar 12:30 khan DGP Conference Hall-ah press conference neiin, Mahindra Mahindra Financial Sevice Ltd. (MMFSL)-a cheng vbc. 150 vel tihchingpen thubuai an chhui chhuah dan chungchang hi a sawifiah.

DGP chuan MMFSL atangin FIR an dawn thu sawiin, 'Aizawl Police Station-ah thubuai ziahluh a ni a, mahse sum involve a tam tham avangin Mizoram Police hnuaia Economics Offensive Wing kutah a chhui hna dah niin, CID (Crime) SP kaihhruaina hnuaiah Special Investigation Team (SIT) din a ni. SIT hi hian hnu chhui hna an thawk,' a ti.

He sum tihchingpenna-a bultumtu ber chu MMFSL, Mizorama Area Business Manager Jakir Hussain (41), Tejpur, Assam a ni tih hriat chhuah a nih thu sawiin Anil Shukla chuan, 'Jakir Hussain leh a thurualpui mi 10 te chu man an ni tawh a, mi paruk jail-ah awmin, mi panga chu thuzawhfiah atan police-in kan la kawl,' tiin, mi pasarih chu hnamdang leh pali chu Mizoram mi an nih thu a sawi.

DGP sawi danin, Jakir Hussain leh a thurualpuite hian document leh chi hrang hrang hmangin MMFSL-ah hian car loan an dil a, car loan ni siin tumah car pe chuang si loin loan hi an lo chang thin. Document lem 2,000 dawn hmangin car loan hi an la chhuak tawh. Aizawl car dealer CK Motor Hyundai, NBE Tata, Rafael Nissan, Aidu Motors Renault leh Standard Motor-te pawh an inhnamhnawih.

Rinhlelh an hlawh lohna atan Jakir Hussain-te hian a khat tawkin loan hi an rul ve thin. Mah se, Mizoram population ngaihtuahin car loan dil an tam lutuk chu MMFSL hian ringhlelin, Jakir Hussain-te chetdan hi man chhuah a ni ta a ni.

SIT-te chuan he thubuai an chhuinaah bank accounts 26 an man tawh a, heta sum awm zawng zawng chu cheng vbc. 2.5 a ni. Hei bakah hian car brand chi hrang hrang 15 cheng vbc. 3 man hu vela chhut pawh an man tawh.

Laptops pathum, mobile phones 10, ghost customer files 549, seals 25, sim card 30 chuang, personal diaries pahnih, indentity document leh thil dang eng emaw zat pawh police hian an kawl.

Thlalak : DGP, Addl. DGP, IGP leh SIT member-te