Ngaihnathiamna dil an tam

Aizawl khawpui chhunga vawk vulh mi 8,530 in vawk vulh laklawh avanga ngaihnathiam dilna Aizawl Municipal Corporation (AMC) ah an thehlut.

AMC-ah Aizawl khawpui veng hrang hrang aṭangin vawk vulh laklawhte'n vulh chhunzawm rih turin ngaihhnathiamna an dil a, April 25, 2024 thleng khan dilna 8,530 a lut tawh. Dilnate hi endik mek a ni.

AMC huam chhungah mihring chenna in atanga ft. 100 huam chhungah vawk vulh khap a ni. Vawk vulh ngaihhnathiamna (exemption) hi January 2024 chhung dilna hun hawn niin, diltute vawk vulh lai leh vulhna hmunte AMC leh local council aiawhte'n an endik mek a, endikna atangin ngaihhnathiamna pek tlâka ngaihte hnenah permit pek a ni ang.

AMC chhungah mi dang tana hlauhawm leh hnawksak theia vawk vulhte chu Municipality Act Section 175 angin Rs 2,000 thleng chawitir theih a ni a, dan an zawm loh zel chuan ni tin Rs 200 chawi belhtir zel theih a ni.

Vawk vulhtu zinga vulh laklawhte chu an vawk len dan azirin tihral/talh hun tur chhût a ni a, chumi hmang chuan ngaihhnathiamna pek a, permit dam hun chhung chhût tur a ni. Permit dam chhung bak chu khuahkhirhna huam chhungah vawk vulh phal a ni dawn lo.