Chiaina tur awm loah ngai

Lumding leh Badarpur inkara rel kawng kawng chhia chu May 10, 2024-ah siamthat hman beisei a nih thu Supply Department hotute chuan Bengvarna zawhna chhangin an sawi.

Supply Department ataga thudawn danin, rel kawng chhe mah se Mizoramah petrol leh diesel rawn lut a awm tho a, rel kawng that lai angin a rawn lut chak lo thung. Mipuite tan chiaina tur a awm lo.

May 10-a rel kawng siamthat a nih chuan dan pangngai angin petrol leh diesel hi a rawn lut leh nghal thuai thei dawn. Tun dinhmunah erawh petrol leh diesel khuahkhirh a la ngai rih.

Supply Department-in petrol leh diesel a khuahkhirh hnuah filling station/petrol pump-a an free sale na hmunahte chuan petrol/diesel lak tum an intlar thui thei hle.

Tarlan tawh angin Supply Director chuan ni 2.5.2024 khan office order ti chhuakin petrol leh diesel khuahkhirh a nih thu a tarlang.

Supply Director chuan Lumding leh Badarpur inkarah rel kawng chhia a awm avângin IOCL POL Depot, Silchar atangin petrol leh diesel a thiar theih rih loh tih tarlangin, 'Lumding leh Betkuchi atanga lak a ngai rih. Hemi avang hian ramchhungah POL a bikin petrol leh diesel lakluh a muanchân deuh dawn avangin khaihlak palh a awm loh nan Filling Station (Petrol Pump) ten motor a thun theih bak gallon/barrel/bottle etc. hmanga pêk chhuah loh tur a ni. Harsatna lian zawk tawk lova mipuiten an mamawh ang Petrol leh Diesel rüalkhai taka an hmuh theihnan 'The Mizoram Trade Articles (Licensing and Control) Order, 1987', para 24 leh 25 in thuneihna min pek angin a hnuaia khuahkhirhna hi ka siam e,' a ti.

Petrol leh diesel pek chhuah dan tur - two wheeler litres 3, LMV litres 10, MMV litres 20 leh HMV litres 40. Buhfai/essential commodities phur truck-te chu an challan milin an kal lam leh haw lam daih pek tur a ni ang.

Tin, filling station-ten an stock hi dead stock tel loin litres 5000 a nih chinah chuan Director/concerned DCSO-te phalna tel loin POL hi an pe chhuak tawh tur a ni lo.