Stacy-in music video a siam

A puala band an neih avangin a single video hi hmuh tur a khat ta pharh a. Mahse, he kum thar hian a single music video thar a rawn her chhuah pui dawn e.

Stacy VL Muanpuii music video thar tur hi 'Ka Chhungkua' tih a ni. He a single music video thar hi nikuma Mizoram Synod hnuaia Family Guidance & Councelling Centre (FG&CC) in Kristian chhungkaw film intihsiakna an buatsaih a Presbyterian Kohhran, Tuikual Branch KTP-in film an siam 'Ka Chhungkua' film hlapui (OST) a ni.

'Ka Chhungkua' tih hi Tuikual Branch KTP member-te vekin video, lyrics, music leh recording bakah production zawng zawng hi an buaipui a ni. A hla phuahtu hi Lalmalsawma niin, music leh recording hi H Lalnuntluanga (Westend Studio) kutchhuak a ni a. A music video hi Bilywaif Films leh Zuala Langelte siam a ni bawk.

Kum 2015 khan Stacy hian a single music video hmasa ber a tichhuak a. Chu chu 'Khawngaihna Thing Kraws' tih kha niin, Tuikual Branch KTP produce a ni a. A debut single a tihchhuah atanga kum kua hnua a single music video tihchhuah leh tur pawh hi, Tuikual KTP Branch produce tur tho a ni.

Stacy music video thar 'Ka Chhungkua' tih hi naktuk (January 12, 2024) hian YouTube lamah hmuh theihin dah chhuah a ni dawn e.

Hetih lai hian, kumin hi Stacy's Band tan kum that kum a nih ngei a beiseiawm hle. Tunah hian Stacy's Band hian hla mawi leh thar tha tak takte recording neiin studio an belbul mek a. Kumin hian music video chhuak tur pawh a awm nual dawn a nih hmel.

September 2018-a indin, Stacy's Band hian music video tihchhuah la nei chiah lo mah se, kohhran leh pawl anga sawmna dawngin, pathian fak leh chawimawia rawngbawlna neiin an feh chhuak ngun hle.