LBS Kia-in Sonet thar tlangzarh

Kia Motors-in India ramah Sonet car a hlawhtlinpui hle a, tunhnaiah a thar tichhuakin Mizoramah chuan vawiin (6.2.2024) chhun khan LBS Kia chuan an showroom, Falkland Vengah an tlangzarh a, pakua an hralh chhuak nghal.

September 28, 2022 khan LBS Kia-in Mizoramah Kia car a hralh chhuak tan.  Sonet lei hmasa ber Anti-Corruption Bureau Additional SP B Laldinngheta'n Sonet thar khuh a hawng a, mipui nghahhlelh a nih thu sawiin a neitute tan hlimna leh lawmna thlen ngei turin duhsakna a hlan.

Kia Motors-in 2020 khan India ramah Sonet a tichhuak a, nuai 3.68 chuang a hralh chhuak. Kum li hnuah a thar tichhuak lehin Mizoram dealer LBS Kia chuan a hlui an hralh tawh leh an tlangzarh ruala pakua an hralh leh a vaiin Sonet 204 an hralh chhuak tawh a ni.

Sonet thar hi sun-roof neia duan niin petrol hmang chi hnih 1.2 L leh 1 L (automatic) bakah diesel hmang 1.5 L a awm a, duhthlan tur rawng chi hrang 11 a awm a, a man ex-showroom prize Rs 8,20,000 atanga intanin Rs 15,90,000 tleng a awm.

A hlui nen a hmelhmang danglamna tam lo hle mah se thiamna sang hmangin changkang leh awlsam tura thuam a ni. Disc brake vek vuah a ni tawh a, a chhung tinuam tur leh vawng dai thei tur thil bilh telin boss sound system thaa thuam a ni tel.

Kia connect hmangin smartphone atanga thunun leh endik theih a ni a, tunlai thiamna ADAS nei telin chet sual laka veng turin kawng hrang hrangah a khalhtu a pui a, him thei ang ber tura duan a ni.