Miss Mizoram 2024 thlang dawn

ZONET TV Pvt. Ltd. chuan kumin 2024 hian Miss Mizoram 2024 a thlang leh dawn a, inbuatsaihna kalpui mek a ni. Miss Mizoram thlang tur hian ZONET chuan Miss Mizoram neitu MJA a thawhpui ang.

Ruahman dan chuan, Miss Mizoram 2024 thlang tur hian kum hmasa lama lo tih tawh angin, district tinah District MJA-te kaltlangin Miss thlan leh phawt tur a ni a, district-a Miss atana thlan chu an district aiawhin Miss Mizoram thlannaah an tel ang a, Aizawla Open Audition buatsaihah an tel ngai tawh loin, finalist an ni nghal ang.

District MJA la awm lohna Saitual District-ah chuan Saituala MJA member-te’n MJA Gen.Hqrs. enpuinain miss thlan an buaipui ang a; Khawzawl District aiawh thlanna pawh Khawzawla MJA member-te’n buaipuiin, Champhai District MJA-in a tul angin an enpui ang.

Miss Mizoram 2024 thlannaah hian Aizawl District-ah chuan Mizoram pum huapin open audition neih a ni dawn a, hetah hian Aizawl District bakah Mizoram chhunga cheng nghet apiang tel theih a ni. District lama tel tawh, District MJA-in an district aiawha an thlan tâk si lohte pawh an duh phawt chuan open audition-ah hian tel theih a ni.

District-a miss thlan hi March 23, 2024 ral hmaa zawh hman tum a ni a, Aizawla Open Audition neih hun atan March 25, 2024 ruahman a ni. Miss Mizoram 2024 contest hi April 2024 chhunga zawh fel tum a ni. Open Audition-a tel duh tan ZONET Office, Zarkawt leh Aizawl Press Club, Treasury Square-ahte application form lak theih a ni a; online-in website www.zonet.in/missmizoramapplication ah inziah luh theih a ni bawk.

Miss Mizoram 2024-a tel thei chin chu hetiang hi a ni:

1. Age 18-27

2. Height 5’5”

3. Single/unmarried/not engaged

4. Resident of Mizoram (Voters ID / Adhaar Card)