Mizo Idol Hmangaihi tinge a reh deuh?

Mizo Idol T Vanlalhmangaihi'n rimawi huangah tal tam duh viau mah se, tun dinhmunah a aia ngaih pawimawh a la nei rih.

Mizo Idol season 7-a pakhatna lawmman dawngtu T Vanlalhmangaihi hi tun lai Zo rimawi khawvela zai tura sawmna dawng tam ber pawl a ni. Mahse, tunah rih chuan zirna a ngaih pawimawh avang leh class an kal tan leh tawh avangin zin tura sawmna tam zawk chu hreh tak chungin 'yes' loh rih a duh tih sawiin, "Aw, tunah rih chuan programme ka la tlem," a ti.

Mizoram University-a Psychology subject-a 3rd semester zir mek Hmangaihi chuan, "Class attendence te a uiawm mai bakah, zir tur a tam tawh lutuk a, class thulh zawnga zin vel chu ka ti vak hrih lo," tiin Bengvarna a hrilh.

Mizo Idol a nih hnuah Hmangaihi hian Idol intihsiak laia a cover vek bak hla a la tichhuak meuh lo. A single track tia sawi theih tur pakhat chu, Mizo film 'Amawii' OST 'I Awm Tlat Si' tih kha a ni. Mahse, a zai ngaina tute tan tun thla, August hian thu lawmawm deuh a rawn nei a. Chu chu, hla thar hlak hmanga music video pakhat tihchhuah a tum hi a ni.

Mizo Idol lai atang tawha a aw mil hla thlang thiam tia sawi thin Hmangaihi chuan, "Hla thar pawh hi siam a hautak reuh lutuk a. Hla dik thlan thiam a ngai si. A buaithlak khawp mai. Mahse, August-ah hi chuan music video hi chu tihchhuah ka tum," a ti.

Album lam hi tunah rih chuan buaipui chuk chuk a la tum lo va, a la hmanhmawh lo. A hmanhmawh loh chhan chu a lehkha zirna piah lamah, a debut album tur a nih avangin a duh uluk avang leh a hla phuah ngei tihchhuah a duh vangin hmanhmawh chuk chuk a duh lo a ni.

Hetih lai hian, Hmangaihi hian professional takin a rimawi zinkawng zawh a duh avang leh a fimkhur avangin, manager tha tak neiin an thawk dun mek. Zai tura sawm dawn pawhin a manager biak hmasak phawt zel a ngai ang.