A fan-te'n Taitea microphone an pe

Nimin (14.2.2025) khan Valentines Day pualin fan-te'n a perform naa a hman bik turin cheng nuai 1 bawr vel man wireless microphone chu Youth Icon 2024 Lalsangliana (Taitea) an pe. Taitea hi Mizo artist zingah Mizoram chhung hmun khata hlawh tam ber record a nei thar nia hriat a ni. 

Taitea Fans Group pakhat 'Gift Box Mizoram leh Singapore' te chuan Taitea hi Sennheiser Company siam digital wireless microphone, hring (neon green) an pe a, Zirtawpni zana Valentines Day puala Warehouse Cafe Folkland-a concert a neihnaah microphone hi an hlan a ni.

A fan-te pek microphone hi Taitea chuan a theih chuan a zaina hmunah te hman zel a tum dawn. Microphobe petute pawhin hmun hrang hranga hman kual theih tur hi an dap kual nasa nia thudawn a ni.

Khawvela huapa zaithiam lar zualte hian microphone hman bik hi an nei fo thin. Mizo zaithiam zingah erawh microphone hran, hman bik nei hi an la tam lo nia hriat a ni a, Taitea hi mic hran nei hmasa pawl nia ngaih a ni.

Taitea chuan a fan-ten an duhsakna zo zai chu ropui a tih thu a sawi a, amah hmangaihtute'n V Day-ah Microphone man to tak an pe chu a lawm hle tih leh a beisei phak piah lam a nih thu a sawi a; a fan-te chu a hmangaih vek thu a sawi.

Zirtawpni zan khan Taitea hian Folkland-a Warehouse Cafe-ah V Day pualin concert a nei a, organiser-te'n an sawi danin Taitea hian a hlawh tam hle. A zat tak hi sawi chiang duh lo mahse record lo awm sa tawh nia hriat 1.2 lakhs a pel daih tih an sawi.

Mizo zaithiam larte hlawh hi a tha chho tawh hle a, chutihrual chuan mimal zaithiam te hian Mizoram chhungah chuan hmun khata an zaiin cheng nuai 1 hi an hlawh pha lo tlangpui a. Taitea hlawh zat hi chiang takin hriat ni lo mahse nuai 1 leh sing 2 chu a pel tam hle nia thudawn a ni a, nuai 1 hlawh te chu an lo awm tawh maitheia Zirtawpni zana Taitea hlawh hi a ang ber pawl tia chhal theih chu a ni.