Juice leh wine an man
admin 08-Jul-2025 07:02 PMMamit District Excise & Narcotics Department chuan vawiin (8.7.2025) khan Mamita dawr pakhat atangin phalna nei lova zawrh juice leh wine um 36 an man.
Thulakna Khawthlir tarlan danin, Mamit Excise-te hian Mamit Bazar Venga MM MART dawr an endiknaah dan phal loha zawrh BCHA Grape Juice um 14; Grape Juice um 9; Zunzam Banana Juice um 5; Isabella Grape Juice um 2 leh Champ Wine um 6, a vaiin um 36 an man. Dawr neitu Lalduatpuii (45), Mamit Bazar Veng chu MLP (Amendment) Act, 2025 hmangin thubuai an siamsak a ni.
Mamit District Excise & Narcotics hotute chuan, thlai aṭanga siam wine/juice (alcohol content) chi hrang hrang chu sorkarin phalna a pekte tan lo chuan zawrh leh hralh phal a ni lo a, phalna nei loa siam, kawl leh hralh chu dan bawhchhiatna a ni tih hre turin mipui an chah a ni.
