Scholarship tur sanction a ni - MZP

MZP chuan thuchhuah siamin,  Ministry of Tribal Affairs chuan nimin (7.7.2025) khan financial year 2023-24 leh 2024-25 chhunga scholarship la sem loh cheng Rs. 50,42,81,000 sanction order a chhuah tih tarlangin, 'Zirlaite'n a rang thei ang bera an dawn theih nan MZP chuan a tul angin hma a la chhunzawm zel dawn,' an ti.

Scholarship chungchangah hian theihtawp chhuahin hma an la tih tarlangin MZP chuan, 'Governor kaltlangin Ministry of Tribal Affairs lam hotute pawh lehkha pek tawh niin, Delhi -ah Ministry of Tribal Affairs lam hotute pawh MZP hruaitute chuan hmuin an zuk bawhzui tawh. Lok Sabha MP Pu Richard Vanlalhmangaiha pawh sawipuiin theihtawp a chhuah mek thu MZP hruaitute a hrilh hnu lawkah a hlawhtlinna hmel hmuh a ni,' tiin lawmawm an tih thu an tarlang.

MZP chuan zirlaite harsatna hria a theihtawp chhuah a, post matric scholarship la dawng lo zirlai 5000 chuang te tan theihtawp chhuah tute chungah zirlaite aiawhin lawmthu an sawi tih tarlangin, 'FY 2024-25 pawh a rang lama sem vat a nih theih nan a hma la nghal turin Mizoram Scholarship Board (MSB) lam hotute pawh kan ngen nghal a ni,' an ti.