MNREGS hnuaia hnathawh thlirlet

Vawiin (8.7.2025) chhun khan Rural Development Minister Prof. Lalnilawma hoin State Employment Guarantee Council (SEGC) chu Aijal Club-ah an thukhawm a, Mahatma Gandhi National Rural Employment Guarantee Act (MGNREGA), 2005 hnuaia hnathawh an thlirlet.

Meeting-a tarlan a nih danin, sorkar kum kal mek 2025-26 atan hna 5,758 thawh tan tawh niin, chung zinga hna 3,326 chu thawh zawh tawh a ni. Job card 2,13,197 pek chhuah tawh zingah job card nung 2,12,676 awmin, heng zingah hian hna thawk thei (active worker) 2,13,444 an awm. Tunah hian Mission Amrit Sarovar Phase II kalpui mek niin, hmun 131 ah dil thar siam leh a awm sa siam that (renovation) nan hmalak mek a ni. Social Audit Report atangin MGNREGS hna thawh kawnga harsatna hrang hrang tawhte leh chinfel an nih thu tarlan a ni. 

MGNREGS hnuaia hnathawhte zirchianna nei turin State Institute of Rural Development (SIRD) ruat an ni a, MGNREGA staff-te hlawh pun leh Employee Provident Fund-a hamthatna an dawn ve theihna tur chungchang ngaihtuah turin committee din nise tih a ni.