Gaza-a indonaah Mizo a thi

Israel sipai Gary Lalhruaikima (21) s/o Dagan Zohmingliana, Kolasib Hmar Venga awm thin chu nimin (11.11.2024) khan Gaza-a indonaah a thi. 

A pa hnen atanga Bengvarna thudawn danin, Gary Lalhruaikima hi a sipai tan hun chhung a zo tep a, indonaah vanduaina a tawk ta a ni. Vanduaina a tawh hun tak hi an la hre chiang thei bik lo. 

Dagan Zohminglianate hi kum 2006 khan Israel-ah an pem a, tunah hian a unaute chu Kolasibah an la awm. Fa pali neiin, nunna chan ta Gary-a hi a naupang ber dawttu niin, a ute pahnih hmeichhia ve ve chu sipaiah an la tang mek.