Lirthei chesualah mi 2 an thi

Nizan (12.11.2024) khan Sateek khaw chhung kawngthlangah Ignis car a chesual a, Mizo pakhat leh hnamdang pakhat an thi.

Bengvarna thudawn danin, hnamdang paliin Ignis car hi an hire a, Sateek khaw chhung in awm lohna lai kawngthlang feet 200 velah an tlan liam a ni. Chetsual thu hriat a nih veleh Sateek khawtlang mipui chuan chetsualna hmun panin, ruang leh hliam tuar lak chhuah hna an thawk nghal.

Lirthei khalhtu T Lalthazawnga (52) h/o Lalsangliani, Zemabawk North chu car awmna thlen hma feet 50 velah car atangin a invawrh chhuak a, chetsualna hmunah hian a thi. Hnamdang pakhat chu car hian delh betin, Aibawk PHC panpui a nih hnuah a hliam tuar loin a thi.

Nunna chante hi car hma lama chuang ve ve an ni a, a hnunga chuang hnamdang pathumte chuan hliamna lutuk an tuar lo. Hnamdangte hi Mumbai lam mi nia hriat an ni.