Ui kawlh vulh khap leh lo

Lunglei DC-in an district chhunga ui kawlh chi vulh a khapna order chu, AH &  Vety Department atanga ngenna an dawn avangin kaltlangpui a ni dawn lo. 

RTI Act hmanga zawhna Lunglei DC Office-in an chhan dani,  Lunglei DC chuan ui kawlh khapna order ni 31.7.2024 khan a ti chhuak a, AH & Vety Department, Mizoram atangin ni 19.8.2024 ah kalpui rih lo tura ngenna an dawng. DC thupek hi kaltlangpui a ni dawn lo.

Tarlan tawh angin, Lunglei District Magistrate chuan ni 31.7.2024 khan ui 21 khuahkhirhna thupek a chhuah a, chung ui vulhte chu chi an thlah lohna atan an chhul/til lak tir vek turin a hriattir.

Lunglei DM chuan District Animal Husbandry & Veterinary Officer (DAH&VO) Office, Lunglei atanga report dawn a nih danin tunlaiin Lunglei District, a bik takin Lunglei khawpui, LMC area huam chhungah Department of Animal Husbandry & Dairying hnuaia Expert Committee-in ui kawlh chi, mihring tana hlauhawm khap tul a tih vulh an awm nual nia hriat a nih thu a tarlang.

He'ng ui hlauhawm chite hian mihring bakah ran dangte pawh sehin, thenawm khawvengte tan harsatna an lo thlen tawh thin tih hriat a nih thu tarlangin Lunglei DM chuan, 'He'ng ui hlauhawm chite hi a vulhtute'n inthlah puntir a, mi dang hnena an hralh chhawn bakah, tualchhung ui nen inthlah pawlhtir (cross-breed) a ni, tiin Lunglei District-ah ui kawlh chi an pung chak hle nia report dawn a nih thu pawh a tarlang.

He'ng ui hlauhawm chite hian mihring bakah ran dangte pawh sehin, thenawm khawvengte tan harsatna an lo thlen tawh thin tih hriat a nih thu tarlangin Lunglei DM chuan, 'He'ng ui hlauhawm chite hi a vulhtute'n inthlah puntir a, mi dang hnena an hralh chhawn bakah, tualchhung ui nen inthlah pawlhtir (cross-breed) a ni, tiin Lunglei District-ah ui kawlh chi an pung chak hle nia report dawn a nih thu pawh a tarlang.

Ui mihring tana hlauhawm nia ngaihte chu - a) American Pitbull Terrier, b) Dogo Argentino, c) American Bull Dog, d) Mastiffs (Boerbulls), Rottweiler, Wolf Dogs, g) Bandog, Tosa Inu, American Staffordshire Terrier, Fila Brasileira,, Boerboel, Kangal, Central Asian Shepherd Dog (Ovcharka), Caucasian Shepherd Dog (Ovcharka), South Russian Shepherd Dog (Ovcharka), Tornjak, Sarplaninac, Japanese Tosa & Akita, Rhodesian Ridgeback, Canario Akbash Dog, Moscow Guard Dog leh Cane Corso- te an ni.

A chunga tar lan ui hlauhawm chi vulh mekte chuan an ui vulhin chi an thlah theih loh nan Veterinary Hospital-ah emaw, private clinic-ah emaw an uite a chhul/til an laktir ngei ngei tur a ni. Thupek zawm lote chu section 223, Bharatiya Nyaya Sanhita (BNS) hnuaiah hrem theih an ni.