ILP lem hmu chhuak

Lawngtlai Election Officer & BDO Collin Hlychho chuan Siaha SDC a nih laia a signature anga inner line permit (ILP) siam hnamdang pakhatin a neih chu a lem a nih avangin police-ah FIR a thehlut.

Collin Hlychho chuan FIR a thehluhah hian ILP lem siamna atan a signature ang an lo hmang tih a tarlang. Mohd Shahnawaz Ali ILP neih chu Siaha DC Office pek chhuah anga siam chawp a ni a, Sub Deputy Commissioner, i/c Inner Line Pass, Siaha District signature a chuang a ni.

Lawngtlai Election Officer & BDO-ah a awm tawh avangin Collin Hlychho hian Lawngtlai PS-ah FIR hi a thehlut a, anni hian Aizawl PS lamah an transfer a ni.

ILP lem neitu hi Mohd Shahnawas Ali (22) s/o Ummed Ali of Chungi Waali Gali, Rasheed Nagar, Meerut City, Uttar Pradesh niin, Thuampui, Aizawla awm mek a ni. Thawmhnaw a zuar thin a, Aizawl PS-te chuan ni 12.11.2024 tlai khan an man.

A ILP neih hi Collin Hlychho hi whatsapp hmanga thawn niin, a lem ngei a ni tih a finfiah avangin, a awm mekna khua Lawngtlai PS-ah FIR a thehlut ta a ni. Lawngtlai PS hian Mohd Shahnawas Ali lo man tawhtu Aizawl PS-ah thubuai hi an transfer.

Thudawnnain a sawi danin, Mohd Shahnawas Ali hian ILP lem a neih bakah, a ILP lem hi mistiri hna thawhna tur a nih laiin thawmhnaw a zuar daih a ni. Tin, a ILP hi en chianin a lem tih a hriat nghal.