CM-in En Tlang Ngaw a hawng

Nagar Van Yojana (Urban Forest) scheme atanga cheng nuai 132 a chei Serchhip khawpui kianga En Tlang Ngaw chu vawiin (12.11.2024) khan Serchhip Bialtu MLA Lalduhoma, Chief Minister-in a hawng.

Chief Minister chuan En Tlang leh a chhevel ram chu Mizoram laili lo luah hmasatute hmunhma langsar, Bengkhuaia awp thin ram a nih vang ngawt pawh hian humhalh a phu tih sawiin, 'India State of Forest Report (IFSR) - 2021 in a tarlan danin, Mizoram pum zau zawng atanga 84.53% chu ramngaw (Green cover) in a la tuam. Hei hian ramngaw nei tha state anga min lan tir laiin, ramngaw tha (Very Dense Forest) erawh chu 0.74% chauh kan nei tawh. North Eastern States zawng zawng zingah ramngaw tha (very denseforest) nei tlem ber kan ni mek. Rambua (open forest) kan tih ang hi kan ngah em em ringawt mai a ni. Kan ram zau zawng a tanga chhutin 56.68% lai hi rambua a ni. Kan ramngaw tha (virgin forest/very dense forest) chu protected areas (National Parks & Wildlife Sanctuaries) ah bak kan nei tawh lo tluk a ni,' a ti.

Serchhip khawtlangin sawrkar chet hma kum tam tak atangin ramngaw humhalh hna an thawk tih sawiin Chief Minister chuan, 'In chhuanawm ka ti a, kan lawm a ni. Ramngaw nei tha ram leh khua apiang hi kan la awt dawn. Vawiina bultantute hi mifing, hmatlir nei tha khua in ni. Kum tinin lo leh huan hal la bansan thei chiah lo mah ila, hmasawnna hnate pawh thawk zel chungin; kan ram hmun tam tak hi tha taka humhalh kan tum dawn. Environmental balance (zero emission) nei turin kal zel kan tum. En Tang ngawah hian ram sa leh savate han tla dul dul mai se, a en turin kan pan ruih ruih mai ang. He hmalakna hian midangte tiharh se, a lo kalpui mek tawhte tiphur zual se,' tiin ram hmangaihna meichher hi Serchhip atang hian nasa takin lo eng chhuak thar se a duhawm thu a sawi.

Nagar Van Yojana hi Sawrkar Laipuiin khaw chhunga ramngaw siam beihpui a thlakna a ni. June 5, 2020  World Environment Day ni tak khan a puang a, a thawh khatnaah 'Kum nga chhungin urban forest 200 siam ni se, sum leh pai hi CAMPA (Compensatory Afforestation Fund Management and Planning Authority) CAF (Compensatory Afforestation Fund) atanga pek ni se, Pune khawpui chhunga Warje Urban Forest chu role model-ah hmangin khawpui dangah hmalak ve ni se' an ti. Vawiina an hawn En Tlang pawh hi chu hmalakna hmanga kalpui chu a ni.