Manipur-a kahhlumte ruangin Mizoram paltlang dawn

Sub. Hqrs. YMA, Kolasib chuan vawiin (12.11.2024) tlai khan thuchhuah siamin, 'Jiribam, Manipur-a CRPF-te'n kan unau an kahhlum mi 10-te ruang chu Churachandpur-a phum turin an rawn phur chho dawn,' tih an tarlang. 

Sub. Hqrs. YMA, Kolasib chuan ruangte hi Silchar-ah postmortem an nih thu tarlangin, 'Lo hmuah tum a ni. An paltlang khua branch/joint group YMA remchang apiangten an ruang lo hmuah nise. A thei chuan puan, ralna sum, pangpar lo pek nise. An rawn thlen hun tur a la hriat theih loa, rindan chuan zanlai pelh hnu emaw, zing khawvar hnuah an rawn chhuak thei chauh ang,' an ti. 

Thudawn danin, Central YMA pawhin Zohnahthlakte ruang hi Aizawlah lo hmuah an tum a, programme erawh siam loin, Bawngkawnah an lo thlah liam ang. Thutlukna fumfe tak erawh an la siam lo thung. 

Ruangte hi Ngopa lam atangin Churachandpur panpui an ni ang. Mi 10 te hi nizan (11.11.2024) khan kahhlum an ni. Kuki-Zo Council chuan mi 10 te hi Kuki-Zo village volunteer-te niin an tarlang.