Health care thar zirho

Nimin (1.4.2025) tlai khan Directorate of Hospital & Medical Education Auditorium-ah Mizoram Universal Health Care Scheme (MUHCS) chungchang zir hona hun buatsaih a ni a, Health Minister Lalrinpuii'n a hmanpui. District tina Chief Medical Officer, District Medical Superintendent, Community Health Centre leh Primary Health Centre-ah thawktute an tel.

Health Minister chuan Mizoram mipui hriselna enkawlna changtlung zawk 'Mizoram Universal Health Care Scheme' hlawhtling taka kalpui nan Health Department thawmthat a pawimawh thu sawiin, 'Chumi tur chuan hospital, CHC leh PHC a dah belh tur medical doctor 8, nurse 300, dialysis technician 10, laboratory technician 10, X ray technician 15, pharmacist 6, public relations officer 4, accounts manager 3 leh data manager 15 lakna tur kalpui mek a ni,' a ti.

Chhuanlam hrang hrang avanga Primary Health Centre emaw Community Health Centre emaw District Hospital atangin khawpui lian zawk a dam lo enkawl hna hlanchhawn a nih hmain an inentirna hmasaah thawktuten theihtawp chhuah a inenkawl hna an kalpui hmasak thin a pawimawh thu Lalrinpuii chuan, 'Hetianga hna kalpui a nih chuan Mizoram chhunga PHC-a khum 500 bawr vel leh CHC-a khum 270 bawr velte chu tangkai zawk a hman a ni thei dawn,' tiin khawpui hospital-a khum indaih lohna avanga harstana thleng thin chu nasa takin a chhawk zangkhai tur thu a sawi.

Lalrinpuii chuan theih bak harsatna a awm a nih erawh chuan dam lo enkawl tura hmun lian zawk a inhlanchhawn chu a tul hun ah chuan inthlahrun lo,' tiin hospital pakhat atanga empanelled hospital danga dam lo refer awlsam zawka kalpui a nih theih nan Medical Referal Board piah lam a empanelled hospital specialist doctor-te thuthlukna chu pawm a nih tur thu pawh a sawi.

Health Minister chuan kuthnathawktute leh khawsak harsate dinhmun chawikan leh an harsatna chhawk zangkhai chu sawrkar ngaih pawimawh berte zing a mi a nih thu sawiin, 'Mirethei zawkte chhawmdawlna mamawh pui ber pahnih chu chhiattawhna leh dam loh nikhua hi a ni. Chhiattawh chungchangah thingtlang mipuite in lumah sawrkarin ruang a phurh thlen sak tawh hnuah, damloh nikhua a sum sen phuhrukna -'Mizoram Universal Health Care Scheme' chu ruahman leh tlangzarh a nih tawh. A taka mipuiin tangkai taka an hman theih nan Health Department hnuai a thawktute an pawimawh hle,' a ti.