Zu sample zirchianna dawng tawh

Excise & Narcotics Department chuan Rangvamual, Phunchawng leh Tuikhurhlua an zu te mihring tana a hlauhawm dan hriatchian a nih theihna atana Delhi-a a sample an test tir result an dawng tawh.

Bengvarna thudawn danin, Excise & Narcotics Department hian zu sample an test tir result dawng tawh mah se, eng anga mihring tana hlauhawm nge tih leh eng chemical-te nge awm tih mipui hnena puangzar tur chuan result hi zirchian ve leh phawt a ngai. Zirchian zawhfel a nih hunah mipui hnenah puanzar tum a ni.

Tarlan tawh angin, Assemmbly Session neih zawh takah khan Excise Minister Lalnghinglova Hmar chuan Rangvamual, Phunchawng leh Tuikhurhlua zute endik tir mek a a nih thu a sawi.

ZPM member Lt. Col. Clement Lalhmingthanga'n 'Aizawl chheh vela zu hmunpui Rangvamual, Phunchawng leh Tuikhurhlua zu quality chhia hi an sawi foa, hemi chungchangah sorkarin hmalak tumna a nei em?' tih a zawhna Excise Minister hian a chhang a ni.

Lalnghinglova Hmar chuan, 'Heng zu hlauhawm nia sawite mihring tana a hlauhawm zia chipchiar taka pholang tur laboratory tha Mizoramah kan neih loh avangin tunah hian Delhi lama Central Laboratory-ah endik tura hmalak mek a ni,' a ti.