Delhi-a function pawimawh taka Esther-i

India hmar chhak puala DoNER Ministry-in intawhkhawmna lian a buatsaih, Ashtalakshmi Mahotsav chu nimin (7.12.2024) tlai khan Delhi-ah Prime Minister Narendra Modi-i'n a hawng a, he hunah hian Lunglei naupang Esther Hnamte a zai. 

Esther Hnamte hian 'Vande Mataram' a sa a, mi pawimawh tak tak kalkhawmten ngaihnawm an ti a ni ang, a zai lai chuan an reh thap mai. A zai zawhah erawh kut beng thawm a ring hle a, kut bemgtu zingah Prime Minister pawh a bang lo. 

A zai zawhah Esther-i hi organiser-te'n Prime Minister hi thilpek an hlan tir. Prime Minister hian lo biain, a hnua an zawh chuan, 'I hla sak zawh chiah kha i thiam chhuak vek em' tia PM hian a lo zawh thu Esther-i hian a sawi. 

Lunglei naupang Esther-i hian youtube-ah followers mi nuai 10.2 a nei mek a, mimal channel-ah chuan Mizo zinga subscriber ngah ber a nih a rinawm a, mimal loah pawh amah aia followers nei tam an awm lo maithei. Hindi hla a sa nasa a, Mizo mai bakah hnamdang lawm a hlawh hle. 

Ashtalakshmi Mahotsav hawn inkhawmah hian DoNER Minister Jyotiraditya Scindia bakah hmar chhak state-a Chief Minister-te he an tel a, Minister of State Lalnghinglova Hmar chu Mizoram Chief Minister Pu Lalduhoma aiawhin a tel a ni.

December 6-8 chhung neih turah hian hmar chhak puala hun hman niin state pariat ațangin an thlai leh thei thar chhuah hrang hrang leh kutthemthiamna hmanga an thil siamte pho chhuah a nih bakah mithiamte inrawnkhawmna hun buatsaih a ni a, state hrang hrangte culture leh zirang hrang hrang entir a ni. Hei bakah hian zai, lam, lemchan, fashion show-te awmin sports lam sawihona hun leh investment lama inrawn khawmna lian thamte a awm bawk.