Icon star pahnihin million view an nei ve leh

LPS Youth Icon, 2024 zet zawngin ngaihhlut a hlawh hle a, an zai lai pawh Youtube lamah entu an tam tawh hle. Youth Icon atana thlan tak Lalsangliana (Taitea) chuan million view video pahnih a nei thu kan ziak tawh, icon star dang pahnihin million view an neih belh a, Taitea pawhin a video pakhatah million view a nei leh. 

Icon star-te'n million view a neihnate hi Youth Icon-a an intihsiakna LPS Vision lamin an Youtube channel-a an dah chhuahte a ni. Taitea hnung zuiin Ramengmawia leh J Lalrosangate chuan million view an rawn nei ve leh ta... 

J Lalrosanga'n million view a neihna hi 'Aw kawngte' tih hla a sakna kha niin, October 16, 2024 khan LPS channel-ah upload a ni. Ramengmawia chuan 'A ruk tein' tih hla hmangin million view a nei a, October 16 a upload tho a ni. 

Taitea chuan 'Hmangaih hmangaih & Herthuli (medley)' hmangin 1 million view rawn neih belhin, million view pathum a nei ta... 

Lalsangliana'n million view a lo neih tawhnate chu 'Khawnglungrun' tih leh 'Nang lo chuan' tih a sak tumte kha an ni. 'Nang lo chuan' tih a sak hi October 16, 2024 khan upload a ni. Million view a neihna dang leh 'Khawnglungrun' tih a sakna video chu October 17, 2024 khan upload a ni thung.