CM-in thudik a sawi - ZPM Thalai

ZPM Thalai chuan thuchhuah siamin Assembly Session neih mekah C Ngunlianchunga zawhna, zawhbelhnaah Lalmuanpuia Punte zawhna ‘Pu V. Zirsanga’n eng case te nge a neih?’ tih House Leader leh Chief Minister ni bawkin a chhannaah  V. Zirsanga ACB case neih pakhatah Ngunlianchunga chu ‘main accused’ a nih thu a sawi chhuak tih tarlangin, 'House Leader-in zawhna a chhannaah, a phuahchawp ni lo, thu dik, engmah belh awm lo. MNF Sorkar hunlaia atanga case kal mek,  Pu Lalduhoma kaihhruai kutthlakna awm loah Pu Ngunlianchunga’n  a ngai haw ta hle mai hi mak kan ti. Assembly House-a mahni insawithiam tuma hun a hmang ta vak mai kha MLA senior tih atan chuan a mawi lo hlein kan. Pu Ngunlianchunga hian a thiamthu sawi a duh chuan Court-ah thahnemngai takin a sawi zawk turah kan ngai a ni.  Pu Ngunlianchunga hian ACB Case neih hi a hre lo tak tak a nih chuan, Pu Lalduhoma, House Leader-in a ACB Case neih a hrilh hria leh anticipatory bail dil tura a rawnna kha Pu Ngunlianchunga hian duhsaknaa ngaiin a lawm hle zawk turah kan ngai,' an ti.

Lalduhoma’n Mizoram Legislative Assembly Session neih mekah MNF Sorkar hunlaia Ngunlianchunga ACB case neih a sawichhuah chungchangah Mizoram Congress Party mi leh sate’n duh lohna lantirna vawiin (12.03.2025)-ah Mizoram Assembly Session neihlai tibuai zawnga awmkhawm phal lohna hmuna an inhawrkhawm chu an zah lohna lian takah an ngai tih tarlangin ZPM Thalai chuan, 'Mizoram Congress Party-in ACB case nei MLA thlavang hauhva hum kan tum zel a nih chuan ram siamthat chu a har hlein kan ring a ni. Mizoram Congress mi leh sate’n Pu Ngunlianchunga thlavang an hauh duh tak tak a nih chuan court-a ngaihtuah a nih hunah theih tawpa tan la turin kan duhsak,' tiin Congress Party chu politics kalphung hlui hmanga party mite hawrkhawma buaina siam tura an inngaihna bansan a, fim taka kan ram siamtha tura politics khel tura an sawm thu an tarlang.