Thudik a ni em puang turin CM kan phut - MPCC
admin 13-Mar-2025 01:43 PMMPCC hruaitute chuan vawiin (13.3.2025) hian Aizawl Press Club-ah press conference neiin, LADC CEM ni ta V Zirsanga nena an inbiakna nia sawi thudik a ni em tih Mizoram mipui hmaa puang turin Chief Minister Lalduhoma an phut.
MPCC Treasurer Lalmalsawma Nghaka chuan LADC-ah Congress leh MNF in sorkar-na siamin tluang taka a kal lai mekin paihtlak thut niin, sorkar lai ruahmanna thuk tak nen V. Zirsanga chu CEM tura lakluh a ni ta tih sawiin, 'Kan hriat theuh angin Special Court-in Pu Zirsanga hi corruption case-ah kum 4 tang tur leh cheng nuai 4 chawi tura a tih a ni. Special Court (prevention of Corruption Act) Judge HTC Lalrinchhana chuan January 19, 2024 khan IPC Section 120B (criminal conspiracy), 409 (criminal breach of trust by public servant) leh 420 (cheating) leh Prevention of Corruption Act hnuaia executive member LADC in-charge education a nih laia vbc. 1.33 tichingpen a ti a ni,' a ti.
February 7, 2024 a ZPM Thalai press statement-a V. Zirsanga he corruption case vang vek a, CEM na taka an demna thu sawiin MPCC Treasurer chuan, 'Ram leh hnam ang pawhin min ti mualpho a, kan ram rorelna sang ber pawh a tizahawm loin a ti bawrhbangah kan ngai a ni an ti. Eirukna laka fihlim lo in, ram hruaitu lu ber nihna chelh chhunzawm a tum zel mak an tih thu an sawi ngeia chu ZPM hotu sangte chuan LADC CEM atan an dah leh si a ni,' tiin ZPM-in lalna leh thuneihna an neih theih nan chuan Special Court-in thiam loh a chantir tawh pawh Lai ram fate lu ber ni tura an la dah zel hian corruption engahmah an ngaihlohzia a tihlan chian thu a sawi.
MPCC Treasurer chuan House zahawm takah House Leader leh CM ni bawkin Lawngtlai West Bialtu C Ngunlianchunga hnenah anticipatory bail la turin thurawn a pe ta mai chu vanduaithlak an tih thu sawiin, 'Mizorama rorelna in kan neih san ber Assembly House zahawmna a tihbawrhban phah hle in kan hria Mahni MLA pui thamlo tak leh invauna anga ngaihtheih thil kha thleng tawh lo se kan ti hle a ni. Pu C. Ngunlianchunga hian anticipatory bail la turin khawi court-ah nge thubuai a neih Mizoram mipui min hrilh turin kan duh hle. Kan CM zahawm tak hian Mizoram mipuite hmaah special court (prevention of corruption Act) in eirukna thubuaiah thiam loh a chantir tawh LADC CEM atan an dahta mai hian corruption do a hnekin mi corrupt-te dinhmun pawimawhah dah pawi an ti lovin corruption hi hmui chauhin an do ta mai em ni kan ti a ni,' a ti.
Dr Lalalsawma chuan, September 13, 2024 khan kan Chief Minister hian V. Zirsanga phone a bia in, 'Pu Zir, i hova LADC a sorkar-na siam kan duh' an tih kha thudik ngei a ni em? tih hi Mizoram mipui hian an hre duh tih sawiin, 'CM leh Pu V. Zirsanga 13.09.2024 a an inbiaknaah kan CM hian hengte hi a tiam reng em ni? (personal thil bakah) - 1) provincialised school 18 LADC kuta hlan 2) Ngengpui Wildlife Sanctuary leh Phawngpui National Park te LADC kuta hlan 3) officer post 20 dawn lakna tur permission pek 4) CEM Bangla tur SASCI hmanga thawh nghal. Heng hi Pu V. Zirsanga’n ni 10.2.2025 khan a ina leng MNF MADC 10 te hnena a sawi nia hriat a ni,' tiin heng hi thudik a ni em tih puang tura Chief Minister an phut thu a sawi.
