MZP-in an ngen nawn

Kum 2023 - 2025 atan MZP hruaitu atana thlan tharte leh MJA member-te chu vawiin (13.10.2023) chhun dar 12 khan MZP pisa-ah an inkawm. MZP hruaitute hnamdang pasal nei candidate-a dah lo turin political party-te an ngen nawn a, dahluih chuan a tlak theihna atana hma an lak tur thu an sawi.

MZP hruaitute chuan Law & Judicial Department Govt. of Mizoramin an tih chhuah 'The Mizo Customary Law'  bung 3:74-na ah chuan '...Mizo hmeichhiain hnam dang pasal a neih chuan hnam dang chhungkuaah a luta ngaih a ni' tih a nih thu tarlangin, 'MZP chuan Mizo hmeichhia hnam dang neite chu hnam dang chhungkuaah a ngai nghet tlat. Mizo mipui aiawha ram rorelna sang bera thu turin a pawm thei lo a ni,' an ti.

Hnamdang kawppui nei lo tura inzirtirna a kalpui bakah, Mizo hmeichhia hnamdang pasal neite MLA candidate a dah lo turin, MLA election apiangin party tinte hnenah ngenna a lo thlen tawh thin tih sawiin MZP hruaitute chuan,  'Kumin 2023 election lo awm tur-ah pawh hian hnamdang pasal neite MLA candidate an awm loh nan December 19, 2022 daih tawh khan party tinte hnenah ngenna lehkha a pe vek a ni,' tiin party thenkhat phei chuan candidate beiseite pawh an thlak phah hial thu an sawi.

MZP hruaitute chuan tun hnaiah hnamdang pasal nei ngeia hriatte hming candidate turin a ri ring hle tih hriat a nih thu sawiin, 'August 21, 2023 khan party tinte hnenah MLA candidate a hnamdang pasal neite dah lo turin ngenna a thawn nawn leh vek a ni. Party President-te pawh hmaichhanah hmuin, kan sawipui tawh. Beiseina sang tak nen a thlir mek a ni. Mizoram rorelna sang ber Assembly House-ah meuh hnamdang pasal neite thut ve hi MZP chuan rem a ti ngai dawn lova, mahni hnampuite aia hnamdang neite hian ram leh hnam thil tak tak an vei phak hi MZP chuan a ring lo a ni,' an ti.

MZP chuan political party tinte hnamdang pasal neite candidate a dah lo turin a ngen nawn a, Mizo mipuite pawhin MZP dinna hriaa hetianga hnamdang chhungkuaa lutte an lo candidate a nih pawhin lo hnawl ngam turin a ngen nghal.