Siaha Sub. Hqrs. YMA-in an sawifiah

Siaha Sub. Hqrs. YMA chuan thuchhuah siamin, sub. hqrs. YMA anga an din tak chungchang an sawifiah a, thil hriat fuh tawk lo awm pawi an ti.

Kum 1972 a Mizoram UT-ah hlankai a nih khan Siaha hi Chhimtuipui District khawpui atan hman a nih thu tarlangin Siaha Sub. Hqrs. YMA chuan, 'Tlang hrang hrang atangin sawrkar hnathawk te, inhlawhfa leh contractor mi eng emaw zat Siaha khawpuiahah hian an lut khawm a ni,' an ti.

Siaha Sub. Hqrs. YMA tarlan danin, district pawn lam atanga mi chi hrang hrang rawn kalkhawmte zinga mi thenkhat khawtlang tana eng eng emaw harsatna siam zawnga khawsa an awm fo thin. Chung harsatnate chu eng emaw tizawng tala chinfel a nih theih nan leh chhiatni leh thatniah pawh intanpui tawn dan a awm beiseina avangin rual u zawkten kum 1978 khan tuna Siaha Vaipi huam chhungah hian YMA an lo din a, Bazar Branch YMA tih a ni.

Hemi atang hian Siaha District leh khawpui chhung veng hrang hrangah YMA Branch din a ni a, tunah hian Sub Hqrs Siaha huam chhungah hian YMA Branch hi 14 a awm. An branch hming leh an din kum te chu Siaha Vaipi (Bazar)YMA 1978, Tipa 'V'- 1979, Siahatla-1980, Tipa 'L'-1980, Phura 1981, New Colony -1983, Council Vaih - 1983, Meisatla-1983, K awlchaw 'W'- 1983, College Vaih-1989, Tipa 'D'-1992, Kaochao 'E'-1998, Lopu-1998, New Siaha-2002 te an ni.

Heng YMA Branch khaikhawm tur hian kum 1984 khan Group 7th YMA (Tuna Chhimtuipui Group YMA hi Siaha ah din a ni. Tunah hian YMA member hi 1500 vel an ni. YMA Branch hi pung zel tura beisei a nih laiin, Central YMA, Sub Hqrs YMA Lunglei, CYLA Gen Hqrs leh MTP Gen Hqrs hruaitute January 29, 2016-a Lawngtlai hmuna inhmukhawm chuan tuna mahni area pawn lama branch ding laite bak hi a thara din belh tura hmalak loh nise tia sawiho a lo ni tawh. Chuvangin Siaha District chhungah hian YMA Branch dang hi din belh a ni tawh lo.

Mizoram chhung District tinah Sub Hqrs YMA hi din a ni deuh zel a, chutih lai chuan Siaha hi Sub Hqrs YMA din ve lohna zingah a tel. Hetiang anih avang hian Sub Hqrs YMA Lunglei kaltlangin Central YMA-ah Sub Hqrs YMA din dilna siam a ni ta a ni.

Sub Hqrs YMA Siaha din chungchangah thil hriat fuh tawk loh avanga harsatna awm hi pawi an ti takzet tih tarlangin Siaha Sub. Hqrs. YMA chuan, 'Hetianga Sub Hqrs YMA a din avang hian YMA Branch dang din belh lam hi kan rilru a ni loa, Group YMA tih ni thin kha Sub Hqrs YMA tia thlak mai a ni. Tun dinhmunah Siaha khawpui ah hian YLA Sub Hqrs, MHIP Sub Hqrs leh MUP Sub Hqrs te nghet takin an ding mek. Ram leh khawtlang thatna tur thilah chuan MTP leh NGO dang te nen hian thawhhona tha neih zel kan beisei,' an ti.