Zothan Autoworks-in an kum 10 tlin an lawm

Tata Motors commercial vehicle dealer Zothan Autoworks chuan nimin (25.8.2025) tlai khan Aijal Club Park-ah kum 10 tlin an lawm a, hetih chhung hian sumdawnna lirthei 7019 an hralh.

August 25, 2015 khan Zothan Autoworks hawngin, September 9 atangin Mizoramah sumdawnna lirthei an hralh chhuak a; kum 10 an tlin rualin 7,019 an hralh.

A tirah hnathawk mi 40 awmin tunah mi 115 an chhawr mek a. February 2021 kha thla khat chhunga lirthei an hralh tam ber niin Vahan-in a chhinchhiah danin 186 an hralh chhuak.

Sale office, Bawngkawnah neiin Phunchawngah Service Station an kalpui a, Lunglei, Lawngtlai, Siaha, Champhai leh Kolasibah branch hawng tawhin Tata OK a hranin an nei tel bawk.

Managing Director Zothantluanga chuan, Pathian hruaina avanga kum 10 tling thei an ni tih sawiin anmahni dawrtu leh puitute chungah lawmthu a sawi bawk a, tun dinhmun an thlen theih chhan chu hnathawktute thawh rimna leh inpekna vang a ni, a ti.

Lirthei an hralh tawh zingah Rs nuai 5.60 man Ace Gold (petrol) a tlawm ber a, Rs nuai 70.45 chuang man Signa 4830 a to ber ve thung.

Anmahni dawrtute zinga mi vannei 10 thlang chhuakin August 25 aṭanga thla ruk chhungin vawi khat a thlawnin lirthei an siamsak dawn a, Rs 50,000 man thleng a huam ang.

General Manager Remruatfela chuan, service lamah hna a hautak avangin sawiselna an tuar fo a, Tata Motors dan hnuaiah anmahni hralh chauh ni lovin Mizorama Tata commercial vehicle chhia a awm a nih chuan khawi hmunah pawh an siamsak a ngai a, an indaih tawk lo ṭhin tih a sawi.

"Thla tin Mizorama contractor-te lirthei hman ringawt pawh 300 aṭanga 400 vel kan veng tel a, chuti chungin theihawp kan chhuaha tunhnaiah hma kan sawn niin kan hria. Sawiselna kan dawngsawng thei reng a, inpan chilha hmaichhana inṭanpui theih a nih phei chuan kan inhawng reng a ni," a ti.

Kum 10 chhungin Zothan Autoworks-in Mizo ṭhalaite dawm kan nan kawng hrang hrangin hma a la tel a, a bikin infiamna lamah hnuhma an nei tam a, LPS Pro Fight-ah title sponsor vawi li (2016, 2019, 2022, 2023) leh Pro Volleyball League-ah title sponsor vawi thum (2016, 2022, 2023) an ni tawh a ni.