Thlan satliah an ni lo - K Sapdanga

Mizoram Police-in tunhnaia constable an lak tharte chuan an training na hmun tur Police Training School (PTS), Thenzawl an thleng kim tawh a, vawiin (26.8.2025) hian Home Minister K Sapdanga'n a tlawh.

Home Minister chuan constable an lak tharte chu khirh leh fimkhur taka lak an nih thu sawiin, 'Thlan satliah an ni lo. Vawiinah hian Mizoram Police-in bung thar kan kai a ni,' a ti a, Training chhungin in rilru leh theihna zawng zawng hlan ang che u,' tiin police uniform hlutzia leh zahawmzia hre turin a fuih.

Home Minister chuan Excise, YMA leh Police-te ṭanghoin drugs leh ngawlvei do beihpui thlak an tum thu sawiin, 'Drugs tawlhrute mai bakah ngawlveite hian rukruk leh pawi dang an khawih thin avangin nun an ti ralti. Chuvangin kan do a ngai a ni. Home Minister ka nih hnuah kuhva tawlhruk nasa lehzuala do a ni a, checkgate-a a pawnga puia pawisa khawn tihtawpa ni.

Tun tum Constable Basic Training hi batch 70-na an ni a, an vaiin constable 277 an ni a, hmeichhia 26 an tel. Training tan hun (start date) hi kumin September 1 aṭangin a ni a, training tan hma kar khat hi zero week ti a vuahin constable tharte luh hun leh an tlangnelna hun atan hman a ni. 

Indoor leh outdoor training kar 45 chhung ngawrh takin an kalpui anga, July 2026 ah zo thei tura beisei an ni. He training course hi uluk taka duan niin, mahni invawng thei mi, mi tha, khawtlang leh ram tana mi hlu chherchhuah chu an tum ber a ni.