Vanlalsailova innghah ngamna tlakah ngai lo

Mizoram Pradesh Youth Congress Committee (MPYCC) chuan thuchhuah siamin, Dampa Bialtu MLA Lalrintluanga Sailo a term hmang zo hman loa a thi chu amah ral nan hmang turin ZPM an phut a, Vanlalsailova chuan bial tana MLA innghahna ngam tlakah an ngaih loh thu an tarlang.

MPYCC chuan Lalrintluanga Sailo (65) in a term hmang zo hman loa July 21, 2025 a chatuan ram min pan san chu pawi an tiin, Congress Party-in a nei a ni tih tarlangin, 'Mizoram chhungah MLA By-election vawi eng emaw zat neih a lo ni tawh. Thihna avanga inthlan that a nih tum phei chuan eng party mahin inthlan buaipuitu Election Department lamin inthlan that tur thuchhuah an neih hmain candidate an puang ngai lo,' a ti.

Tun hnai lawk kum 2021 a Tuirial Bialtu, ZPM MLA Andrew H. Thangliana a boral tum pawhin Election Dept. lamin inthlan that a nih tur thu an puan hmain eng party mahin candidate an puang lo tih tarlangin MPYCC chuan , 'Hei hi MLA-te zahawmna leh bial mipui tawrhpuina zahawm takah kan ngai,' tiin Andrew H Thangliana boral avanga inthlan that a nih dawn khan ZPM leader leh tuna Chief Minister Lalduhoma hian hetianga bialtu MLA a'n boral hian ralna atan party dang pawhin candidate pawh an siam ngai loh thu uar takin a sawi tih an tarlang.

MPYCC chuan unah Lalrintluanga Sailo hi ZPM hian ralna tlingah an ngai lo nge Election Dept. atanga inthlan that a nih tur thuchhuah pawh a awm hmaa ZPM candidate an puang an dem takzet tih tarlangin, 'Mihring inzah lohna lian takah kan ngai. Hei bakah hian Pu Rintluanga boral sarhû laia ZPM party-in boruak siama programme hrang hrang an buatsaih leh Assembly House-a amah sûnna (obituary) êm pawh hman anih hmaa candidate an puang hi Mizoram mipui dem leh mak tih a hlawh hle. ZPM Party-in pawisak an neih lohzia leh midang an zah lohzia an nemnghetah kan ngai,' an ti.

ZPM Party-in an candidate atana an puan tak Vanlalsailova'n inthlan senso phuhruk ngei a tum thu a sawi pawh Dampa Bial mipui tan thil hlauhawm leh mahni inhaivur tumna, bial tana MLA innghah ngamna tlakah Congress Thalai an ngai lo tih tarlangin MPYCC chuan, hetiang Politics tha lo leh hlauhawm hi Mizoram mipui leh Dampa Bial mipuiin hnawl turin an ngen.