Zaninah Fak Zai top 10 ṭan dawn
admin 15-Aug-2024 09:53 AM
General PYD, Mizoram UPC leh Literature & Publication Board ṭangkawpin a buatsaih, mal zai intihsiakna Pentecost Fak Zai top 10 intihsiakna chu zaninah neih ṭan a ni dawn - a zan khatnaah hian mi pangain intihsiakna an hmachhawn ang.
August 16, Zirtawpni zan dar 8:00-ah intihsiakna neih chhunzawm leh tur niin, zaithiam panga dangin intihsiakna hi an hmachhawn leh dawn a, top 10 chinah hian live music hmanga inelna neih tur a nih tawh avangin inelna a hmuhnawm sawt beisei a ni.
Zanin intihsiaknaah hian, Pentecost Fak Zai 2022-a top 10-a lo lang tawh, Shion Lalbiaknunga'n zai hmasa berin, top 10 a hawng dawn a, ani zai dan hi a lunglenthlakin, nu ho duh chi a ni!
N. Mualcheng nula Zonunsangi'n a aw tham deuh chel leh mawi tak nen inelna a hmachhawn leh ang a, Chhinga Veng lam mi Lalruathlui zai pawh hi kum upa lam ngainat chi niin a lang. Lalzemawia 'aw' hi mipa 'aw' dik tak a ni a, ngaihthlak a nuam - Dinthar nula zaithiam C. Lalruatsangi hi Mizo Idol thlenga sulhnu hraw lo hnutchhiah tawh a ni a, a che velin mit a titlai ṭhin a, beng a fah viau bawk.
August 16, Zirtawpni zana inlan turte pawh hi an ṭha hle. N. Mualcheng lam mi tho Sylvia K. Ramdinsangi hian zai a awlsam ni berin a lang a, N. Chaltlang tlangval C. Chawngsangzela'n aw pa 'hrak' a nei tih ngam a ni. Zonuam nula Lalhmangaihzuali boruak sangah a talbuai lo viau a, Vanlalhmachhuana hi 'country' lam ngaina tan chuan a belhchian tlak.
Buhchangphai tleirawl Malsawmzuali'n mipui lawm a hlawh a, thilpek pawh a dawng hnem - a thil dawn zingah 'vawkte' a tel!
Pentecost Fak Zai hi television-a en duh tan Zonet Rimawi lamah live-a en theih a ni dawn a, online-a en duh tan General PYD YouTube channel lamah a en theih bawk ang.
