Baryl-i'n Mafeli Hlawndo a fak hle

MLA Baryl Vanneihsangi chuan amah ang thoa radio jockey lo ni tawh leh Comedian Search host tawh, Youth Icon, 2024 host Mafeli Hlawndo a fak hle.

A bial chhung mi Youth Icon top 9 Zothankima (Kimkima), Tachhip an khua-a an lo hmuahna a hmanpui naah thu sawiin Baryl-i chuan, 'Nula, nu leh pite kan au pawr, tlangval leh pa ho erawhin an ring an fan an fan. A chhan chu Miss Mafeli a awm loa, khawiah nge maw a tuam le. Ka chhuang a, kan zingah awm se ka ti hle mai,' a ti.

Baryl-i chuan Mafeli chu amah ang thoa radio jockey hlui a nih thu sawiin, 'Red FM-ah ka hnu lawkah a rawn thawk a, chulai atang chuan a thiam, a theihnate ka lo hmu tawh. Ram rawngbawlna lamah a inpe em em,' Mafeli chu tiin ram leh hnam hmangaihtu a nih thu a sawi.

A la duhtawk lo cheu Baryl-i chuan Mafeli fak chhunzawmin, 'Pathian tih mi, Pathian mi hriat leh Pathian hretu a ni a, malsawmna tam tak dawng zel turin vawiin hian duhsakna ka hlan,' a ti.

Comedian Search host hlui Baryl-i chuan LPS ten an show hlu ber ber Comedian Search leh Youth Icon platform an pek avangin Mafeli a lawmpui thu sawiin, Mafeli chungchanga a thusawi a titawp.