Zaninah Mizo Film Award sem dawn

Zanin (29.11.2024) hian Entertainment Society of Mizoram (ESM) chuan Dawrpui Multipurpose Hall-ah Mizoram Film Award, 2024 an sem dawn a, Sports & Youth Services Minister Lalnghinglova Hmar-in a hmanpui ang.

Mizoramah film chhuak a tam ve ta hle a, film industry lamah Mizoram a thang mek a, mi tam takin eizawnna atan an hmang tawh a ni. Kuminah ringawt pawh film chhuak a tam tawh hle a, kan film siamtute leh changtute hmasawnna hmuh hmaih rual a ni lo a, hma an la sawn zel turah ngai ang.

Zanin hian category 15 ah award sem a ni dawn a, Mizo film chhuak tawhte thlirin award buatsaihtute pawh an lu a hai ve mapin a rinawm. Kumin hian kum danga an la sem ngai loh Best New Actor in a Leading Role, Best New Actress in a Leading Role, Best Sound Design, Best Costume Design leh Best Documentary-te sem te a ni dawn.

Jury hrang hrang ruat niin, Mizoram pawn mi pakhat a tel. Anni hian short list siamin, chu chu midangin an

endik ve leh a, an point pek theuh belhkhawm a ni. Mipui vote chu 30% a awm a ni.

Award sem inkhawm hi Hruaitei'n a kaihruai dawn a, zai tur pawh an chhe lo. Tunlai Mizo zaithiam zingah chuan sawm hlawh leh mite lawm hlawh rual J.Lalrosanga, Mary Dawngi, Youngfella, Zothana & Zodini

leh Rebecca Lallawmsangite an perform dawn. Mit leh beng a tlai viauin a rinawm.