A video 13 zet 1 million view!
admin 03-Dec-2024 07:13 PM
Mizo mipui zat atanga chhut chuan Mizo tan chuan Youtube lama 1 million view neih hi thil awlsam a ni hauh lo mah se, Mizo mukbang thin zingah a video 13 ngawt 1 million (nuai 10) view nei thei a awm!
Youtube lama en hlawh ber zinga mi chu zaithiamte an ni awm e, Mizo zaithiam zingah hian 1 million view 10 nei an awm a nih pawhin an tam hauh lo ang. Darlawn tlangval, Aizawla cheng mek Lalnuntluanga, Youtube lama SMAKE tia hriat lar chuan a mukbang video 13 ah 1 million view a nei thei tlat. 1 million view tling mai tura ngaih pawh a video zingah a la awm nual.
1 million view video a neih zinga 12 chu amaha a mukbang lai niin, pakhat erawh naupang nen an mukbang lai a ni thung. 1 million view video 13 a nei satliah loa, thenkhat chuan 1 million a pel nasa tawh hle.
Lalnuntluanga chuan a mukbang hma ni hnih thum velah thil mawm a ei ngai loh thu leh a mukbang dawn niah chuan zing atanga chaw a ei ngai loh thu a sawi. Mukbang na atan hian sa a hmang deuh ber a, thlai leh hmarchate pawh a tel thin.
