CM-in thu belhchiandawl lo a sawi - MNF
admin 02-Jul-2025 02:04 PMMNF chuan thuchhuah siamin, June 30, 2025 khan Chief Minister Lalduhoma chuan Irrigation & Water Resources Department conference hall-ah ZPM Sorkar chu kuthnathawktute ipte-a pawisa thun hnem ber a nih thu a sawi tih tarlangin, 'A thu sawi hi belhchiandawl lo, amah ngei pawhina a awih loh tur a ni. Pu Lalduhoma hian eng tehna nge a hman tih kan zawt a ni,' an ti.
MNF Sawrkar liam ta khan SEDP Pilot Project atan kum 2019-2020-ah vawk vulhtu chhungkaw 220-te hnenah Rs. 3,00,000 theuh, a vaiin Rs. 66,000,000 an ipteah a thun sak tih tarlangin MNF chuan, 'Ar (broiler leh rainbow rooster) vulhtu chhungkaw 800 hnenah Rs.150,000 theuh, a vaiin Rs. 120,000,000 a pe bawk,' tiin sericulture hnuaiah pawh chhungkaw 425 hnenah Rs 150,000 theuh, a vaiin Rs. 63,750,000 kuthnathawktute ipte-ah a thun tih an tarlang.
Covid-19 pandemic vangin SEDP chu chhunzawm theih ni rih lo mah se, kum 2021-2022 financial year atan SEDP hnuaiah kuthnathawktu chhungkaw 60,000 te tan Rs. 1,500,000,000 pek an nih thu tarlangin MNF chuan, 'Kum 2022-2023-ah cheng vaibelchhe 150 pek leh an ni. Kum 2023-2024 atana cheng vaibelchhe 150 dah fel sa erawh chu MNF Sorkar khan a hmang hman ta lo Chuti chungin kuthnathawktute bultanna tur leh an intunna tura tanpuina pek zat chu avaiin Rs. 3,249,750,000 a ni,' an ti.
Hetiang hi Covid-19 hripuiin kan ram economy a tihchhiat kârah pawh MNF Sawrkarin kuthnathawktute ipte-a pawisa a thun dan a ni tih tarlangin, hetih laia Chief Minister-in cheng vaibelchhe 90.4 sawhthing lei nan an hmang chu, ti ?ha ber anga a insawiah puhin, MNF chuan inngaihtuah nawn se an duh.
MNF tarlan danin, RTI zawhna Agriculture Department-in a chhan dan chuan ZPM Sorkar hian nikum 2024-a kuthnathawktute sawhthing an chin tir zat chu quintal 2,74,173 a ni a, thar chhuak tura a beisei zat chu quintal 14,83,256 a ni. June ni 27, 2025 thlenga an lei zat erawh chu quintal 2,33,604 chauh a ni. Hei hi thar chhuak tura beisei zat atanga chhûtin za zelah sawm leh panga (15.7%) chauh an lei sak tihna a ni.
Sawhthing lei kawngah ZPM Sawrrkar a 'fail' chiang hle a, 'pass mark' an hmu pha lo tih hi MNF chuan Chief Minister Lalduhoma leh a kaihhruai sorkar hi a hriat tir duh a ni.
