Chawhmeh zuarte thutna tur ngaihtuah

Vawiin (2..7.2025) chhun khan Urban Development & Poverty Alleviation (UD&PA) Minister K. Sapdanga hoin a office-ah Aizawl khaw chhunga chawhmeh zuar, kawngkama thu thinte thutna tur hmun rem zawk chungchang an ngaihtuah.

Vawiin thutkhawmah hian Aizawl Tennis Court chhehvel kawngkama chawmhmeh zuara thu thinte harsatna sukiang tur leh an thutna tur hmun dang ngaihtuah turin working committee din ni se tia rel a ni. Convener-ah AMC Commissioner bakah Aizawl DC, Aizawl SP leh Traffic SP te member atan ruat an ni. Anni hian Aizawl khaw chhung veng hrang hranga chawhmeh zuara kawngkama thu thinte traffic ti buai lo leh felfai zawka an thut theihna tur hmun an ngaihtuah dawn.

He hunah hian Aizawl khawpui chhung kawngpui kam leh footpath-a chawhmeh pho leh zawrh chhuah thin chuan lirthei chetvelna a tihbuai mai bakah mihring kalna tur a dal thute, kawng a chep phah avanga lirthei khalhtute, kawng sira thute leh kawnga kalte tan pawh a him loh thute leh AMC in veng hrang hranga market a sakte pawh luahkhah loha an awm mek thute tarlan a ni.

Meeting-ah hian Aizawl Mayor Lalrinenga Sailo, Deputy Mayor R. Thanglura, Commerce & Industries Commissioner Dr. Lalzirmawia Chhangte, UD&PA Secretary Lalmalsawma Pachuau, Information & Public Relations Secretary Betsy Zothanpari Sailo, AMC Commissioner Joseph H. Lalramsanga, Aizawl DC Lalhriatpuia, Aizawl SP Rex Zarzoliana Vanchhawng, Sr. SP Traffic Ruatsanga Ralte bakah Khatla leh Tuikhuahtlang Local Council aiawhte an tel a ni.